சென்னையில் உள்ள 3,770 வாக்குச் சாவடிகளில், மக்களவை, சட்டமன்ற இடைத்தேர்தல் பணிகளில் ஈடுபடும் 20 ஆயிரம் அரசு ஊழியர்கள், 16 ஆயிரம் காவல்துறையினர் என மொத்தம் 36 ஆயிரம் பேர் தபால் ஓட்டு மூலம் வாக்களிக்கவுள்ளனர்.
அவர்களுக்கான இரண்டு கட்ட தேர்தல் பயிற்சிகள், 16 பயிற்சி மையங்களிலும் நடைபெற்று வருகிறது. இப்பயிற்சியில் பங்கேற்றுவரும், தேர்தல் பணியாளர்களுக்கு (அரசு ஊழியர்கள், காவல்துறை அடக்கம்) தபால் வாக்குச்சீட்டு வழங்கப்பட்டுள்ளது.
இந்நிலையில், கடந்த 7ஆம் தேதி அரசு ஊழியர்களுக்கு முதற்கட்ட தபால் வாக்குப்பதிவு நடைபெற்றது. இதைத்தொடர்ந்து, தேர்தல் பணியில் ஈடுபடவுள்ள காவலர்கள், காவல் அலுவலர்களுக்கான முதற்கட்ட தபால் வாக்குப்பதிவு இன்று வட சென்னை, மத்திய சென்னை, தென் சென்னை ஆகிய பகுதிகளில் நடைபெற்று வருகிறது. இதில், 2,323 காவலர்களும், காவல் அலுவலர்களும் வாக்களித்து வருகின்றனர்.
அந்தவகையில், மத்திய சென்னை தொகுதிக்கு உட்பட்ட வில்லிவாக்கம், எழும்பூர், ஆயிரம் விளக்கு, சேப்பாக்கம்-திருவல்லிக்கேணி, அண்ணா நகர், துறைமுகம் ஆகிய பகுதிகளில் தேர்தல் பணியில் ஈடுபடவுள்ள காவல்துறை அதிகாரிகளுக்கான முதற்கட்ட தபால் வாக்குப்பதிவு இன்று எழும்பூரில் உள்ள பிரெசிடென்சி அரசு பெண்கள் மேல்நிலைப் பள்ளியில் நடைபெற்று வருகிறது.
காலை 7 மணிக்கு வாக்குப்பதிவு துவங்கும் என தெரிவிக்கப்பட்டிருந்த நிலையில், தேர்தல் நடத்தும் அலுவலர்கள் தாமதத்தால் காலை 9 மணிக்கு வாக்குப்பதிவு தொடங்கியது.
அதேபோன்று, வட சென்னையில் ராயபுரம் செயின்ட் பீட்டர்ஸ் மேல்நிலை பள்ளியிலும், தென் சென்னையில் நந்தனம் ஆண்கள் கலை கல்லூரியிலும் தபால் வாக்குப்பதிவு கால தாமதமாகவே நடைபெற்றது. இந்த தபால் வாக்குப்பதிவானது இன்று மாலை 6 மணியுடன் நிறைவடையவுள்ளது.
