அப்போது அவர் பேசுகையில், “விவசாயிகளுக்கு வட்டி இல்லா கடன் போன்ற எண்ணற்ற திட்டங்களை அறிவித்து உள்ளனர். ராம ஜென்ம பூமியில் ராமர் கோயில் கட்டப்படும் என்றும் சபரிமலை கோயிலில் கலாச்சாரம் காக்க உச்சநீதிமன்ற தீர்ப்பை சட்டப்பூர்வமாக எதிர் கொள்வோம். நீர் மேலாண்மைக்காக தனி அமைச்சகம் உருவாக்க உள்ளனர். தமிழகம் போன்ற மாநிலங்களில் நீர் மேலாண்மைக்கு முக்கியத்துவம் கொடுக்கப்படும். முத்ரா வங்கி கடன் திட்டம் மேலும் மேம்படுத்தப்படும், 100 நாள் வேலை வாய்ப்பு திட்டத்திற்கு மேலும் வலுவூட்டும் விதமாக திட்டத்தை மேம்படுத்த உள்ளோம்.
சிறு குறு தொழிலாளர்கள் நலன் பெற பல்வேறு திட்டங்கள் இந்த தேர்தல் அறிக்கையில் இடம் பெற்றுள்ளது. விவசாயிகளின் லாபம் இரட்டிப்பாக்கப்படும் என்பது தேர்தல் அறிக்கையில் மட்டுமே கூறுகின்றனர். நடைமுறையில் இல்லை என்ற எதிர்க்கட்சிகளின் குற்றச்சாட்டுக்கு விவசாய கடன் ரூ.11 லட்சம் கோடி வரை கொடுக்கப்பட்டுள்ளது. விலையை இரட்டிப்பாக்க கட்டமைப்புகளை மேம்படுத்த வேண்டும், தற்போது அதை மேம்படுத்தி வருகிறோம், எனவே விலை இரட்டிப்பு என்பது சாத்தியமே. தமிழகத்தில் நீர் மேலாண்மை இல்லை, தொழில்நுட்ப உதவியுடன் நீர் மேலாண்மையை வலுப்படுத்த வேண்டும் என்பதே எங்களின் நிலைபாடு.
நீட் தேர்வை பொருத்த வரை உச்சநீதிமன்றம் தீர்ப்பு வழங்கியுள்ளதால் அதை ரத்து செய்ய வேண்டும் என்றால் அது சட்ட சிக்கலைதான் ஏற்படுத்தும். காங்கிரஸ் அறிவிப்பில் நீட் தேர்வை விரும்பாதவர்களுக்கு விலக்கு என்பது குழப்பத்தை ஏற்படுத்தும். மக்களை குழப்புவதற்கே இதுபோன்ற அறிவிப்பை காங்கிரஸ் அறிவித்து வருகிறது. மக்களை முட்டாள்கள் என நம்பி காங்கிரஸ் நீட் தேர்வை வைத்து குழப்பம் செய்கிறது” என்றார்.
மேலும், ஸ்டெர்லைட், நெடுவாசல் பிரச்னை ஈழ போர் உள்ளிட்ட பிரச்னைகள் திமுக அங்கம் வகித்த காங்கிரஸ் ஆட்சியில்தான் நடந்தது எனவும் அவர் கூறினார். காங்கிரஸ் கவர்ச்சியாக தேர்தல் அறிக்கையை வெளியிட்டுள்ளது. ஆனால், அதில் பலன் இல்லை எனவும், ஜி.டி.பி நன்றாக உள்ளது என்று சிதம்பரமே கூறுகிறார் என்றும் நாராயணன் தெரிவித்தார்.
