தூத்துக்குடி: கோவில்பட்டியில் அதிமுக சார்பில் போட்டியிடும் செய்தி மற்றும் விளம்பரத் துறை அமைச்சர் கடம்பூர் ராஜு, கோவில்பட்டி நகரப் பகுதிகளில் உள்ள மாதா கோவில் தெரு, ஏ.கே.எஸ். தியேட்டர் ரோடு, பகத்சிங் தெரு, வ.உ.சி. நகர் உள்ளிட்ட பகுதிகளில் உள்ள பொதுமக்களிடம் தீவிர வாக்குச் சேகரிப்பில் ஈடுபட்டார்.
தொடர்ந்து கடலை மிட்டாய் உற்பத்தியாளர்கள் சங்கம் சார்பில் தனியார் திருமண மண்டபத்தில் வைத்து நடந்த நிகழ்வில், அமைச்சருக்குப் பொன்னாடை போர்த்தி மரியாதை செலுத்தப்பட்டது.
இந்நிகழ்வில் கடலை மிட்டாயைத் தமிழ்நாட்டிலுள்ள பள்ளிகளில் சத்துணவுடன் வழங்க நடவடிக்கை எடுக்க வேண்டுமென கோரிக்கை முன்வைக்கப்பட்டது.
பின்னர் பேசிய அமைச்சர் கடம்பூர் ராஜு, "தூத்துக்குடி மாவட்டம் கோவில்பட்டியில் பிரதான தொழிலாக உள்ள கடலை மிட்டாய்க்குப் புவிசார் குறியீடு பெற்றுக்கொடுக்க நடவடிக்கை எடுக்கப்பட்டது.
தொடர்ந்து கடலை மிட்டாயை அனைத்து அரசு பள்ளிகளிலும் சத்துணவுடன் கொடுக்க நடவடிக்கை எடுக்கப்படும் எனத் தேர்தல் அறிக்கையில் தெரிவிக்கப்பட்டுள்ளது" என்றார்.
