திருப்பூர் மாவட்டம் அங்கேரிபாளையம் பகுதியில் பின்னலாடை நிறுவனத்தை நடத்திவருபவர் சுரேஷ். அங்கு சுமார் 400-க்கும் மேற்பட்ட தொழிலாளர்கள் பணிபுரிந்துவருகின்றனர். இந்நிலையில், விநாயகர் சதுர்த்தியை முன்னிட்டு கடந்த மூன்று தினங்களுக்கு முன்பு அப்பகுதியைச் சேர்ந்த இந்து முன்னணியினர் சிலர் நன்கொடை கேட்டுச் சென்றுள்ளனர்.
அப்போது பத்தாயிரம் ரூபாய் பணத்தை கேட்டு வற்புறுத்தியதால் சுரேஷ் பணம் கொடுக்க மறுத்துள்ளார். இதனைத் தொடர்ந்து, திருப்பூர் மாநகரம் முழுவதும் நேற்று விநாயகர் சிலை விசர்ஜன ஊர்வலம் நடைபெற்றது. அங்கேரிபாளையம் பகுதியில் விநாயகர் சிலையை வைத்து பிரதிஷ்டை செய்த இந்து முன்னணியினரில் சிலர் அத்துமீறி பின்னாலாடை நிறுவனத்திற்குள் புகுந்து காவலாளியை தாக்கியுள்ளனர்.
பின்னர் விநாயகர் சிலையை கொண்டுசென்ற வாகனத்தை மேள தாளங்களுடன் நிறுவனத்திற்குள் கொண்டுவந்து தகராறு செய்துள்ளனர். இதைத் தட்டிக்கேட்ட பின்னலாடை நிறுவன ஊழியர்களை இரும்புக் கம்பிகளை கொண்டு தாக்கியுள்ளனர். இதில் நான்கு பேருக்கு தலையில் பலத்த காயம் ஏற்பட்டுள்ளது.
விநாயகர் சிலையுடன் நுழைந்து இந்து முன்னணியினர் செய்த சம்பவம் அங்கிருந்த கண்காணிப்புக் கேமராவில் பதிவாகியுள்ளது. மேலும் பின்னலாடை நிறுவன உரிமையாளர் சுரேஷ் அளித்த புகாரின் பேரில் காவல் துறையினர் விசாரணை மேற்கொண்டுவருகின்றனர்.
