நெல்லை கல்குவாரி விபத்து மீட்புப்பணியில் தாமதம்... காரணம் என்ன..?

நெல்லை கல்குவாரி விபத்தில் ஐந்தாவது நபரின் உடலை மீட்பதில் தொடர் தாமதம் ஏற்பட்டுவருகிறது. அதிகளவில் பாறைகள் குவிந்து கிடப்பதால் தாமதம் ஏற்படுவதாக தகவல்.

திருநெல்வேலி: பொன்னாகுடி அடுத்த அடை மிதிப்பான் குளத்தில் உள்ள தனியார் கல்குவாரியில் பாறைகள் சரிந்து விழுந்து விபத்து ஏற்பட்டதில், தொழிலாளர்கள் ஆறு பேர் சிக்கினர். இதுவரை ஹிட்டாச்சி ஆபரேட்டர்கள் முருகன், விஜய் ஆகிய இருவரும் உயிருடன் மீட்கப்பட்டுள்ளனர். மூன்றாவதாக ஆப்பரேட்டர் செல்வம் உயிருடன் மீட்கப்பட்டாலும் மருத்துவமனையில் சிகிச்சை பலனளிக்காமல் உயிரிழந்தார்.

இரண்டாவது நாளாக நடைபெற்ற மீட்பு பணியில் நேற்று லாரி கிளீனர் முருகன் உடல் மீட்கப்பட்டது. அந்த வகையில் பலி எண்ணிக்கை இரண்டாக உயர்ந்தது. இந்த நிலையில் இன்று(மே 17) மூன்றாவது நாளாக மீட்புப் பணி நடைபெற்றுவருகிறது.

இதில் ஒருவருடைய உடல் காணப்பட்டுள்ளது. பாறைகள் குவிந்துகிடப்பதால், உடலை மீட்பதில் தாமதம் ஏற்பட்டுள்ளது. இந்த உடல் ராஜேந்திரன் உடையாதா அல்லது செல்லக்குமார் உடையதா என்பது குறித்து தகவல் தெரியவில்லை. பாறைகளை அகற்றி உடலை மீட்க மீட்பு குழுவினர் தீவிர முயற்சியில் ஈடுபட்டுள்ளனர். உடலை மீட்ட பிறகே யாருடையது என்பது தெரியவரும்.

இதையும் படிங்க: திருநெல்வேலி கல்குவாரி விபத்தில் இறந்தவர்களின் குடும்பத்தினருக்கு தலா ரூ.15 லட்சம் நிவாரணம் - ஸ்டாலின் அறிவிப்பு