சேலம் மாவட்டத்தில் ஏற்பட்டுள்ள காலநிலை மாற்றத்தால் காய்ச்சல், சளி, இருமல் உள்ளிட்ட நோய்களால் ஏராளமானோர் பாதிக்கப்பட்டுள்ளனர். இதனால் சேலம் தலைமை அரசு மருத்துவமனையில் நோயாளிகளின் எண்ணிக்கை திடீரென அதிகரித்துள்ளது. எனவே இவர்களுக்கென பிரத்தியேக வார்டு ஒன்று தனியாக அமைக்கப்பட்டு உள்ளது.
இந்நிலையில், சேலம் மாவட்ட ஆட்சியர் ராமன் அரசு மருத்துவமனையில் திடீர் ஆய்வு மேற்கொண்டார். இதில் டெங்கு காய்ச்சலால் பாதிக்கப்பட்டு சிகிச்சை பெற்றுவரும் நோயாளிகளின் நிலை குறித்து மருத்துவர்களிடம் கேட்டறிந்தார்.
தொடர்ந்து செய்தியாளர்களிடம் பேசிய ராமன், 24 பேர் டெங்கு காய்ச்சலால் பாதிக்கப்பட்டு சிகிச்சை பெற்று வருகிறார்கள். மேலும் மாவட்டம் முழுவதும் 44 பேர் டெங்கு காய்ச்சலாலும், 182 பேர் சாதரண காய்ச்சலாலும் பாதிக்கப்பட்டு சிகிச்சை பெற்று வருகிறார்கள்” எனத் தெரிவித்தார்.
மேலும் காய்ச்சல் பாதிப்பு இருந்தால் பொதுமக்கள் போலி மருத்துவர்களை அணுகாமல் அரசு மருத்துவர்களை உடனடியாக அணுக வேண்டும் எனவும் அவர் அறிவுறுத்தியுள்ளார்.
இதையும் படிங்க: சென்னையில் பிரபல ரவுடி பினு மீண்டும் கைது!
