சேலத்தில் மாவட்ட மார்க்சிஸ்ட் கம்யூனிஸ்ட் கட்சியின் அலுவலகம் முன்பு கம்யூனிஸ்ட் கட்சியின் நூறாவது ஆண்டு விழா இன்று நடைபெற்றது. இதையொட்டி கட்சி அலுவலகம் முன்பு அமைக்கப்பட்டிருந்த தத்துவமேதை கார்ல் மார்க்ஸ் சிலையை மார்க்சிஸ்ட் கம்யூனிஸ்ட் கட்சியின் அரசியல் தலைமைக் குழு உறுப்பினர் பிரகாஷ் காரத் திறந்து வைத்தார். இந்த விழாவில் மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பாலகிருஷ்ணன் உள்ளிட்ட கட்சியினர் கலந்து கொண்டனர்.
பின்னர் பொதுக்கூட்ட மேடையில் பிரகாஷ்காரத் பேசுகையில்," இந்தியாவை தற்போது ஆர் எஸ் எஸ் இயக்கம்தான் ஆட்சி செய்து வருகிறது . மோடி அரசு இரண்டாவது முறையாக ஆட்சிப் பொறுப்பேற்ற நாளிலிருந்து இந்தியாவின் அரசியல் சாசன சட்டத்தை நீர்த்துப்போகும் வகையில் நடவடிக்கைகளை மேற்கொண்டு வருகிறது. ஜம்மு-காஷ்மீர் மாநிலத்திற்கான சிறப்பு சட்டத்தை நீக்கிய மத்திய அரசு, அம்மாநில மக்கள் சுதந்திரமாக செயல்பட முடியாத சூழலை உருவாக்கியுள்ளது.
பிரதமர் மோடியும், அமித் ஷாவும் மகாத்மா காந்தியின் 150ஆவது பிறந்த நாளை கொண்டாடி வருகின்ற நிலையில், அதே காந்தியை சுட்டுக் கொலை செய்யப்பட்ட விவகாரத்தில் கைது செய்யப்பட்ட சாவர்க்கருக்கு பாரத ரத்னா விருது வழங்க வேண்டும் என்று கூறுகிறார்கள். இதன்மூலம் இந்திய ஜனநாயகத்தை நெறிக்கும் செயலில் பாஜக அரசு ஈடுபட்டு வருவது தெளிவாகிறது. சுதந்திரப் போராட்ட காலத்தில் இந்திய விடுதலைக்கு பாடுபடாமல் பிரிட்டிஷ் அரசாங்கத்திற்கு ஆதரவாக செயல்பட்ட ஆர்எஸ்எஸ் இயக்கம் தற்போது முன்னிலை பெற்றுள்ளது. இது இந்தியாவின் நலனுக்கு உகந்தது அல்ல" என்றார்.
சில நாட்களுக்கு முன்னதாக அமித் ஷா, சாவர்க்கருக்கு பாரத ரத்னா விருது வழங்கப்பட வேண்டும் என பேசியது குறிப்பிடத்தக்கது.
இதையும் படிங்க: உலகத்தின் முதல் சோசலிச ஜனநாயகவாதி நேரு!
