பிறப்பைப்போல் இறப்பும் இயற்கையின் வழிகாட்டுதலில் நிகழ்வதுதான் சரி. ஆனால், யாரோ ஒருவர் உங்கள் இறப்பை தீர்மானிப்பதை ஏற்றுக்கொள்ள முடியுமா? ஆனால், சாலை விபத்து மரணங்கள் அப்படித்தான் நிகழ்கின்றன. அதுவும் மது போதையில் வாகனம் ஓட்டிச்சென்று விபத்தை ஏற்படுத்தி உயிர் பறிக்கும் கொடுமையை எப்படி சகிப்பது?
இது தொடர்பாக நமது ஈடிவி பாரத் தமிழ்நாடு ஊடகத்திற்காக சிறப்பு நேர்காணல் வழங்கிய, சமம் குடிமக்கள் இயக்கத்தின் மாநிலத் தலைவர் வழக்கறிஞர் சி.ஜே.ராஜன், “ மாநிலம் முழுவதும் தற்போது 6 ஆயிரத்து 300 டாஸ்மாக் கடைகள் உள்ள நிலையில், ஏறக்குறைய 70 லட்சத்திற்கும் மேற்பட்ட மக்கள் குடிகாரர்களாக இருக்கிறார்கள் என ஒரு புள்ளி விவரம் கூறுகிறது. உழைக்கும் மக்கள் தங்களது வருமானத்தில் 40 விழுக்காட்டிற்கும் மேல் குடிக்காக செலவு செய்கின்றனர்.
குடிக்கு அடிமையான ஒருவருக்கு ஆல்கஹால் தலைக்கேறி பார்வை கோளாறை உருவாக்குகிறது. அப்படிப்பட்டவர்கள்தான், நிதானமும் பொறுமையும் இல்லாமல் வாகனங்களை ஓட்டி மிகப்பெரிய விபத்துகளை ஏற்படுத்துகின்றனர். சாலை விபத்து மரணங்கள், கணவனை இழந்த பெண்கள் ஆகிய இரண்டும் அதிகமுள்ள மாநிலமாக தமிழகம் இருப்பதற்கு குடிப்பழக்கமே அடிப்படை காரணம்.
அதிமுக கடந்த தேர்தல் அறிக்கையில் தெரிவித்த, படிப்படியாக டாஸ்மாக் எண்ணிக்கையை குறைப்போம் என்ற வாக்குறுதி எந்த அளவிற்கு பின்பற்றப்படுகிறது? தீபாவளி போன்ற பண்டிகை நாள் மது விற்பனைக்கு அரசே இலக்கு நிர்ணயிக்கிறது. குறிப்பிட்ட விழுக்காட்டினரை குடிநோயாளிகளாக அரசே மாற்றியிருப்பது எந்த வகையில் சரியாக இருக்கும்?
மது விற்பனை ஒருபுறம், அதனால் ஏற்படும் சாலை விபத்துகள் மறுபுறம் என உயர் நீதிமன்றமே பலமுறை கவலை தெரிவித்து, குடித்து விட்டு ஓட்டுவோரின் வாகன உரிமத்தை ரத்து செய்ய வேண்டும் என்கிற அளவுக்கு கூட கருத்து தெரிவித்துள்ளது.
இந்தியர் அனைவருக்கும் உயிர் வாழும் உரிமையை, அரசியலமைப்புச் சட்டத்தின் 21 ஆவது பிரிவு வழங்குகிறது. ஆனால், சாலையில் சாதாரணமாக நடந்து செல்வோருக்குக்கூட குடித்து விட்டு வாகனம் ஓட்டும் நபர்களால், அவ்வுரிமை பறிக்கப்படுகிறது என்பதே எதார்த்த உண்மை.
அரசின் மொத்த வருவாயில் 35% மது விற்பனையால் கிடைக்கிறது என்று சொல்வது மிகப்பெரிய அவமானம். எனவே தமிழக அரசு உடனடியாக பூரண மதுவிலக்கு என்ற பழைய மதுக்கொள்கையை மீண்டும் கொண்டு வர வேண்டும். பூரண மதுவிலக்கால் கள்ளச்சாராயம் பெருகும், மதுப்பிரியர்கள் பக்கத்து மாநிலங்களுக்கு படையெடுப்பர் போன்ற பொருளற்ற வாதங்களை அரசு உடனடியாக நிறுத்த வேண்டும்.
வரப்போகும் தேர்தலுக்காக பரப்புரை மேற்கொண்டுள்ள மக்கள் நீதி மய்யத் தலைவர் கமல் ஹாசன், தான் ஆட்சிக்கு வந்தால் மதுவிற்பனை தனியாரிடம் வழங்கப்படும் எனக் கூறியுள்ளார். மது விற்பனையை தனியார் செய்தால் என்ன, அரசு செய்தால் என்ன? பூரண மதுவிலக்கு என்பது தான் அரசியல் கட்சிகளின் சட்டப்பேரவை தேர்தல் வாக்குறுதியாக இருக்க வேண்டும் ” என்று தெரிவித்தார்.
இதையும் படிங்க: தண்டுவடம் பாதிக்கப்பட்ட பேரனுடன் தங்குவதற்கு வீடு இல்லாமல் பரிதவிக்கும் தம்பதி
