சென்னை: லா நினாவால் தமிழ்நாட்டில் குளிர் அதிகமாக இருக்கும் எனத் தென் மண்டல வானிலை ஆய்வு மையத் தலைவர் கூறியுள்ளார்.
நிவர் புயல் கரையை கடந்த பின்னர் தமிழ்நாட்டில், சென்னை உள்பட கடலோர மாவட்டங்களில் குளிர் அதிகமாக உணரப்பட்டது.
இது ஒவ்வொரு புயல் கரையை கடந்த பின்னர் நடக்கும் இயல்பான ஒன்று என்று பார்த்தாலும், லா நினா என்னும் ஓர் தன்மையால் இந்த வருடம் டிசம்பர் மாதம் முதல் பிப்ரவரி வரை பனி அதிகமாக இருக்கும் என்று வானிலை ஆய்வு மையம் தகவல்கள் தெரிவிக்கின்றது.
லா நினா (La Nina) என்பது ஸ்பானிஷ் மொழி வார்த்தை. லா நினா என்றால் சிறுமி என்று ஸ்பானிஷ் மொழியில் பொருள். லா நினா (La Nina ) - எலினோ (El Nino) இரண்டும் நேர் எதிரானவை. பசிபிக் கடல் பகுதிகளில் இருக்கும் எந்த லா நினாவின் தாக்கத்தாலும் உலகளவில் வானிலையில் பெரிய மாற்றங்கள் ஏற்பட வாய்ப்புகள் உள்ளது.
இது குறித்து நம்மிடம் தென் மண்டல வானிலை ஆய்வு மைய தலைவர் பாலச்சந்திரன் பேசியபோது, “இயல்பாக பசிபிக் கடல் மேற்கு பகுதி வெப்பமாகவும், கிழக்கு பகுதி வெப்பம் குறைவாக இருக்கும்.
இந்த இயல்பை விட மேற்கு பகுதியில் வெப்பம் குறைவாகவும், கிழக்கு பகுதியில் வெப்பம் அதிகமாக இருக்கும். அதற்கு பெயர் தான் எல் நினோ (El Nino). இதற்கு நேர் எதிராக இருப்பது தான் லா நினா (La Nina).
லா நினாவின் போது மேற்கு மற்றும் மத்திய பசிபிக் கடல் பகுதிகளில், இயல்பை விட வெப்பம் குறைவாக இருக்கும்” எனத் தெரிவித்தார்.
தொடர்ந்து பேசிய அவர், “பொதுவாக வட இந்தியாவை ஒப்பிடும் போது, தமிழ்நாட்டில் குளிர் குறைவாக இருக்கும். கடல் பகுதியையொட்டி இருப்பதால், குளிர் குறைவாக இருக்கும். லா நினா தாக்கத்தால் குளிர் அதிகமாக இருக்க கூடும்” எனத் தெரிவித்தார்.
