கடந்த ஆண்டு செப்டம்பர் மாதம் நடைபெற்ற குரூப் 4 தேர்வுக்கு, கடந்த நவம்பர் மாதம் முடிவுகள் வெளியிடப்பட்டன. இந்நிலையில், கீழக்கரை மற்றும் ராமேஸ்வரம் தேர்வு மையங்களில் தேர்வு எழுதிய 35 நபர்கள், முதல் 100 தரவரிசையில் முன்னிலை பெற்றிருப்பது தெரிய வந்துள்ளது. இதனால் முறைகேடு நடந்திருக்கலாம் என்ற குற்றச்சாட்டு, தேர்வர்கள் தரப்பில் முன்வைக்கப்பட்டது .
இதுகுறித்து விளக்கம் அளித்துள்ள தமிழ்நாடு அரசுப் பணியாளர் தேர்வாணையம், கீழக்கரை மற்றும் ராமேஸ்வரத்தில் தேர்வு எழுதிய 2,840 பேரில் 262 பேர் வெளி மாவட்டத்தினர் என்று தெரிவித்துள்ளது. சான்றிதழ் சரிபார்ப்புக்கு அழைக்கப்பட்ட 57 பேரில், 40 பேர் வெளி மாவட்டத்தைச் சேர்ந்தவர்கள் என்றும் தெரிவித்துள்ளது.
இந்நிலையில், குரூப் 4 தேர்வு முடிவுகள் வெளியான பின் சான்றிதழ் சரிபார்ப்புக்கு தேர்வு செய்யப்பட்ட 24 ஆயிரம் பேர்களின் தேர்வுத்தாள்களை ஆய்வு செய்யும் பணியை, அரசுப் பணியாளர் தேர்வாணையம் தொடங்கியுள்ளது. மேலும், தேர்வர்களின் விடைத்தாள், சான்றிதழ், முகவரி உள்ளிட்ட அனைத்து விபரங்களும் சரிபார்க்கப்பட்டு வருகிறது.
இந்தப்பணிகள் 4 அல்லது 5 நாட்களில் முடிந்தபின், குரூப் - 4 தேர்வில் முறைகேடு நடந்ததா? இல்லையா? என்கிற விவரங்கள் தெரியவரும் என்று அரசுப் பணியாளர் தேர்வாணைய வட்டாரங்கள் தெரிவிக்கின்றன.
இதையும் படிங்க: பள்ளிக் கல்வித் துறையில் குவிந்துள்ள வழக்குகளைக் குறைக்க குழு!
