சென்னை: பொறியியல் மாணவர் சேர்க்கையில், மாணவர்களின் கட்-ஆஃப் மதிப்பெண் என்பது தரவரிசையை நிர்ணயம் செய்து, மாணவர்களுக்கு சிறந்தக் கல்லூரிகளில் விரும்பியப் பாடத்தினை தேர்வு செய்வதில் முக்கியப் பங்கை வகிக்கிறது.
10ஆம் வகுப்பு மதிப்பெண்
கடந்த 2020-21ஆம் கல்வியாண்டில், கரோனா தொற்றால் பிளஸ் 2 வகுப்பு பொதுத் தேர்வு ரத்து செய்யப்பட்டதுடன், 10ஆம் வகுப்பில் அதிக மதிப்பெண் பெற்ற மூன்று பாடங்களின் மதிப்பெண்கள் கணக்கில் கொள்ளப்படும் என, தமிழ்நாடு அரசு அறிவித்துள்ளது.
இதைத்தொடர்ந்து, பொறியியல் சேர்க்கையில் பத்தாம் வகுப்பு மதிப்பெண்கள் முக்கியத்துவம் பெற்றுள்ளன. குறிப்பாக, கடந்த 2019ஆம் ஆண்டு நடந்த பத்தாம் வகுப்பு முடிவுகள் தான் கணக்கில் எடுக்கப்படவிருக்கிறது.
இந்த 2019ஆம் ஆண்டில் பத்தாம் வகுப்பு தேர்வில் பெரும்பாலான மாணவர்கள் அதிக மதிப்பெண்களைப் பெற்றுள்ளனர். இதனால், நடப்பு கல்வியாண்டில் பொறியியல் மாணவர் சேர்க்கையில் 'கட்- ஆஃப்' எனப்படும் தரவரிசை மதிப்பெண் கணிசமாக அதிகரிக்கும் என கல்வியாளர்கள் தெரிவிக்கின்றனர்.
கட்-ஆஃப் அதிகரிக்க காரணம்
கடந்த 2018-19ஆம் கல்வியாண்டில் வெளியான பத்தாம் வகுப்பு தேர்வு முடிவில், பெரும்பாலான மாணவர்கள் 451 மதிப்பெண்களுக்கும் கூடுதலாகப் பெற்றுள்ளனர். இதுவே தரவரிசை மதிப்பெண் உயர்வதற்கு முக்கியக் காரணமாகப் பார்க்கப்படுகிறது.
கடந்த 2019 ஆம் ஆண்டு, 10 ஆம் வகுப்பு தேர்வில் 481க்கும் அதிகமான மதிப்பெண்களை 9 ஆயிரத்து 402 மாணவர்களும், 451 - 480 மதிப்பெண்கள் வரையில், 56 ஆயிரத்து 837 மாணவர்களும், 451 மதிப்பெண்களுக்கு கூடுதலாக, 66 ஆயிரத்து 239 மாணவர்கள் பெற்றிருக்கின்றனர்.
இதன்படி, கடந்தாண்டு ஒவ்வொரு கல்லூரிக்கும் இருந்த தரவரிசை மதிப்பெண் அடிப்படையில், அதே கல்லூரிகளில் இந்த ஆண்டும், அதே பாடப் பிரிவுகளில் மாணவர்கள் சேர விரும்பினால், கணிசமான அளவில் கட்-ஆஃப் மதிப்பெண்கள் அதிகரிக்கும் என, எதிர்பார்க்கப்படுகிறது.
எவ்வளவு கட்-ஆஃப் தேவை
கடந்தாண்டு கட்-ஆஃப் மதிப்பெண்ணை ஒப்பிடுகையில் (200க்கு), இந்தாண்டு தரவரிசை மதிப்பெண் எவ்வளவு உயர வாய்ப்புள்ளது என்பதைக் காணலாம்.
சென்ற ஆண்டு, ஒரு கல்லூரி தரவரிசைப்பட்டியலில் 149 மதிப்பெண்களுக்கு கிடைத்த இடமானது, இந்தாண்டில் 175 மதிப்பெண்கள் எடுத்தால்தான் கிடைக்கும் என்றும், 160 மதிப்பெண்ணுக்கு கிடைத்த இடத்தினை பெற 181 மதிப்பெண் தேவைப்படும் என எதிர்பார்க்கப்படுகிறது.
மேலும் 195 மதிப்பெண்களுக்கு கிடைத்த இடம், 199 கட்-ஆஃப் எடுத்தால் மட்டுமே கிடைக்கும் என்ற நிலை உருவாகியுள்ளது.
சேர்க்கை எப்படியிருக்கும்
நடப்பு கல்வியாண்டில் 15 ஆயிரத்திற்கும் அதிகமான மாணவர்கள் 190-க்கும் அதிகமான கட்-ஆஃப் மதிப்பெண்களை பெறுவதற்கு வாய்ப்புகள் உள்ளதாகத் தெரிகிறது.
மேலும், அதிகளவில் மதிப்பெண்கள் உயர்ந்தாலும், விண்ணப்பிக்கும் மாணவர்களின் கட்-ஆஃப் மதிப்பெண்கள் அடிப்படையில்தான் பொறியியல் படிப்பு சேர்க்கை நடத்தப்படும் என்பது குறிப்பிடத்தக்கது.
