தமிழ்நாடு கரோனா பாதிப்பு நிலவரம் குறித்து சுகாதாரத்துறை அமைச்சர் விஜய பாஸ்கர் இன்று செய்தியாளர் சந்திப்பை மேற்கொண்டார். அப்போது, தமிழ்நாடு அரசு மேற்கொண்ட ரேபிட் பரிசோதனை கருவிகள் கொள்முதல் குறித்து எதிர்க்கட்சித் தலைவர் ஸ்டாலின் குற்றச்சாட்டுக்கு பதிலளித்துள்ளார்.
எதிர்க்கட்சியினரின் குற்றச்சாட்டு குறித்து பேசுகையில், தற்போதைய சூழ்நிலை உலகளவில் பேரிடராக அறிவிக்கப்பட்டுள்ளது இது அரசியல் செய்வதற்கான காலம் அல்ல. எதிர்க்கட்சித் தலைவர் ரேபிட் கிட் விவகாரத்தில் அரசியல் செய்கிறார். ஆந்திராவில் தமிழ்நாட்டை விட அதிக விலை கொடுத்து வாங்கி உள்ளனர். அங்குள்ள எதிர்க்கட்சித் தலைவர் ஆந்திர முதல்வரை பாராட்டுகிறார். ஆனால் இந்தியாவில் முதன்முதலாக ரேபிட் கிட் ஆர்டர் செய்து பரிசோதனையை தொடங்கியது தமிழ்நாடுதான்.
அரசை பாராட்டாவிட்டாலும் தொற்றுநோய் மற்றும் மரணத்தில் அரசியல் செய்ய வேண்டாம். இந்த மலிவான அரசியலை வன்மையாக கண்டிக்கிறேன். தமிழ்நாடு முதலமைச்சர் ஒவ்வொரு உயிரையும் முக்கியமாக கருதும் சூழலில் எதிர்க்கட்சித் தலைவர் ஸ்டாலின் இறந்தவர்களுக்கு ஒரு கோடி கொடுக்க வேண்டும் என்று வலியுறுத்தும் கோரிக்கையை எவ்வாறு எடுத்துக்கொள்வது என்பதை மக்களிடமே விட்டுவிடுகிறேன் எனத் தெரிவித்துள்ளார்.
இதையும் படிங்க: "ஒன்றிணைவோம் வா" - கட்சியினருக்கு மு.க. ஸ்டாலின் அழைப்பு!
