தமிழக காங்கிரஸ் கமிட்டித் தலைவர் கே.எஸ். அழகிரி சத்தியமூர்த்தி பவனில் இன்று செய்தியாளர்களைச் சந்தித்தார். அப்போது அவர், ' உள்ளாட்சித் தேர்தலில் மதச்சார்பற்றக் கூட்டணி மகத்தான வெற்றி பெற்றுள்ளது. எங்கள் அணிக்கு மக்கள் 50 விழுக்காட்டிற்கும் மேல் வாக்களித்துள்ளனர்.
இலங்கைத் தமிழர்களுக்கு இரட்டைக் குடியுரிமை என்பது பொருத்தமற்றது. இலங்கை அரசு இதற்கு ஒத்துக்கொள்ளாது. இலங்கைத் தமிழர்களுக்கு முதலில் இந்தியக் குடியுரிமை வழங்க வேண்டும். குடியுரிமை திருத்தச் சட்டத்திற்கு ஆதரவாக வாக்களித்து விட்டு, தற்போது அவர்களை ஏமாற்ற இரட்டைக் குடியுரிமை என தமிழ்நாடு அரசு நாடகமாடுகிறது.
டெல்லி ஜவஹர்லால் நேரு பல்கலைக்கழகத்தில் தாக்குதல் நடத்தியவர்கள் பாஜகவின் ஆதரவைப் பெற்றவர்கள். அரசின் ஆதரவு இருந்தால்தான் இவ்வளவு பெரியத் தாக்குதலை நடத்த முடியும். அங்கு மாணவர்கள் தாக்கப்பட்டதைக் கண்டித்து காங்கிரஸ் கட்சி சார்பில், நாளை மாலை 4 மணிக்கு வள்ளுவர் கோட்டத்தில் ஆர்ப்பாட்டம் நடத்தப்படும்.
ஜனவரி 8ஆம் தேதி நடக்கும் அனைத்து தொழிற்சங்கங்களின் நாடு தழுவிய வேலை நிறுத்தப் போராட்டத்திற்கு காங்கிரஸ் கட்சி ஆதரவளிக்கிறது' எனக் கூறினார்.
உள்ளாட்சித் தேர்தலில் கணிசமான இடங்களில் பாஜக வெற்றி பெற்றுள்ளது குறித்து செய்தியாளர்கள் எழுப்பிய கேள்விக்கு பதிலளித்த கே.எஸ்.அழகிரி, ' 5 ஆயிரம் இடங்களில் 90 இடங்கள் வெற்றி பெறுவது என்பது பெரிது இல்லை. சமூகம், சொந்தம் உள்ளிட்ட பல்வேறு காரணங்களின் அடிப்படையில் மக்கள் வாக்களிப்பார்கள். அது எல்லாமும் பாஜகவுக்கான வாக்குகள் கிடையாது' என்றார்.
இதையும் படிங்க: குடியுரிமை சட்ட எதிர்ப்பு: சென்னையில் கோட்டை முற்றுகை போராட்டம்!
