கன்னியாகுமரி மாவட்டம் குழித்துறையில் 1962 ஜூன் 5இல் பிறந்தவர் சைலேந்திர பாபு. 1987ஆம் ஆண்டு தமிழ்நாடு கேடரில் ஐபிஎஸ் அலுவலராகத் தேர்வுபெற்ற அவர் தர்மபுரி மாவட்ட காவல் உதவிக் கண்காணிப்பாளராகத் தனது பணியைத் தொடங்கினார்.
தொடர்ந்து சேலம், திண்டுக்கல், செங்கல்பட்டு, கோபி, சிவகங்கை, கடலூர், காஞ்சிபுரம் மாவட்டங்களில் காவல் கண்காணிப்பாளராகவும், சென்னை அடையாறில் காவல் துணை ஆணையராகவும் பணியாற்றினார்.
அடுத்தடுத்து பதவி உயர்வு
பின்னர் விழுப்புரம் சரக டிஐஜியாகப் பதவி உயர்வு பெற்ற அவர், சென்னையின் இணை ஆணையராகவும், பின்னர் திருச்சி சரக டிஐஜி-யாகவும்கூட பொறுப்பு வகித்துள்ளார். இதையடுத்து வடக்கு மண்டல ஐஜியாகப் பணியாற்றிய இவர், லஞ்ச ஒழிப்புத் துறையின் தலைமை அலுவலர், சிறைத்துறை ஏடிஜிபி என அடுத்தடுத்து தான் பணிபுரிந்த பிரிவுகளில் எல்லாம் தடம்பதித்தார்.
தொடர் பதவி உயர்வு, பாராட்டுகள் என வெற்றிக் களிப்பில் இருந்தவர், அடுத்து தமிழ்நாடு கடலோரப் பாதுகாப்புக் குழுமத்தின் கூடுதல் டிஜிபியாகவும் பின்னர் ரயில்வே காவல் துறை டிஜிபியாகவும் பதவி உயர்வுபெற்றார். ரயில்வே டிஜிபியாகப் பணியாற்றியபோது, பல்வேறு துறை சார்ந்த சீர்திருத்தங்களில் முக்கியப் பங்கு வகித்துள்ளார்.
பல்துறை வித்தகர்
உடற்பயிற்சி, உணவுக்கட்டுப்பாடு விளையாட்டுத் துறை ஆகியவற்றில் பெரும் ஈடுபாடுகொண்டவர் சைலேந்திரபாபு. 2002ஆம் ஆண்டு இலங்கையில் நடைபெற்ற ஆசிய தடகளப் போட்டி, 2003ஆம் ஆண்டு பாரிசில் நடைபெற்ற உலகத் தடகளப் போட்டி, 2007ஆம் ஆண்டு ஜப்பானில் நடைபெற்ற உலகத் தடகளப் போட்டிகளிலும் அவர் அங்கம் வகித்துள்ளார்.
மேலும், பெய்ஜிங் ஒலிம்பிக் போட்டியில் பங்கேற்ற இந்திய தடகள வீரர்களுக்கு கண்காணிப்பாளராகவும் அவர் நியமிக்கப்பட்டார். புத்தக வாசிப்பு, இளைஞர்களை ஊக்குவிக்கும் வகையில் சொற்பொழிவாற்றுதல் எனப் பல்துறை வித்தகரான இவர் சைக்கிளிங்கில் பெரும் ஆர்வம்கொண்டவர்.
சாதிக்க ஆசைப்படு
500 கி.மீ., 1000 கி.மீ. என இவர் சைக்கிளிங் செய்வதோடு அதனைக் காணொலியாக சமூக வலைதளங்களில் பதிவிட்டு மற்றவர்களுக்கும் உந்து சக்தியாகச் செயல்பட்டவர். இவர் சென்னைப் பல்கலைக்கழகத்தில் குற்றவியல் துறையில் முனைவர் பட்டம் பெற்றவர் என்பது குறிப்பிடத்தக்கது. நீங்களும் ஐ.பி.எஸ். ஆகலாம், சாதிக்க ஆசைப்படு உள்ளிட்ட பல்வேறு புத்தகங்களை எழுதியுள்ளார்.
என்கவுன்டர் ஸ்பெஷலிஸ்ட்
கோவை காவல் ஆணையராக ( 2010-11) பணியாற்றியபோது, சிறுவர்கள் (அக்கா, தம்பி) இருவரை கொடூரமாக கொலைசெய்த குற்றவாளிகளை என்கவுன்டர் செய்தது, கோவை கொடிசியா மைதானத்தில் உலகத்தமிழ் செம்மொழி மாநாட்டை சிறப்பாக நடைபெறச் செய்தது எனச் செயல் வீரராகச் சிறப்பாகப் பணியாற்றியவர்.
காவல் துறையில் அவர் ஆற்றிய பணிகளை மெச்சும் வகையில், சிறப்பாகக் கடமையாற்றியமைக்கான குடியரசுத் தலைவர் விருது, உயிர் காக்கும் பணிகளை மேற்கொண்டமைக்கான பிரதம மந்திரி விருது, தமிழ்நாடு முதலமைச்சரின் வீரதீர விருது, தமிழ்நாடு சிறப்பு டாஸ்க் ஃபோர்ஸின் கேலண்டரி காவல் துறை பதக்கம் உள்ளிட்ட பல்வேறு விருதுகள், பதக்கங்களைப் பெற்றுள்ளார்.
இதையும் படிங்க: விடைபெறுகிறார் என்கவுன்டர் ஸ்பெஷலிஸ்ட் ஜே.கே. திரிபாதி!
