கரோனா வைரஸ் பரவலைத் தடுக்க நாடு முழுவதும் ஊரடங்கு பிறப்பிக்கப்பட்ட நேரத்தில், சென்னை உயர் நீதிமன்றம், மதுரைக் கிளை, தமிழ்நாடு மற்றும் புதுச்சேரி முழுவதும் உள்ள நீதிமன்றங்களின் பணிகளை மூன்று வாரங்களுக்கு நிறுத்தி வைத்து சென்னை உயர் நீதிமன்றம் உத்தரவிட்டது.
இதன் காரணமாக ஆக்கிரமிப்புகள் அகற்றம், சட்டவிரோத கட்டுமானங்களை இடிக்கத் தடை விதித்து பிறப்பித்த உத்தரவுகள் காலாவதியாகும் நிலை ஏற்பட்டதால், தலைமை நீதிபதி ஏ.பி.சாஹி உத்தரவின்படி, தாமாக முன் வந்து வழக்கை விசாரணைக்கு எடுத்த சென்னை உயர் நீதிமன்றம், அந்த இடைக்கால உத்தரவுகளை ஏப்ரல் 30 ஆம் தேதி வரை நீட்டித்து கடந்த விசாரணையில் உத்தரவிட்டது.
இந்நிலையில், அந்த இடைக்கால உத்தரவுகளை ஜூன் 1ஆம் தேதி வரை நீட்டித்து, நீதிபதிகள் சத்தியநாராயணன் மற்றும் நிர்மல்குமார் அடங்கிய அமர்வு உத்தரவிட்டுள்ளது. ஆக்கிரமிப்பு அகற்றவும், இடத்தை காலி செய்யவும், கட்டடங்களை இடிக்கவும் பிறப்பிக்கப்பட்ட உத்தரவுகளை அமல்படுத்தி இருக்காவிட்டால் ஜூன் 1ஆம் தேதி வரை அந்த உத்தரவுகளை நிறுத்தி வைக்க வேண்டும் எனவும் அந்த உத்தரவில் தெரிவிக்கப்பட்டுள்ளது.
அதேபோல, இடைக்கால பிணை உத்தரவு, பரோல் உத்தரவு ஆகியவற்றுக்கும் கால நீட்டிப்பு செய்து நீதிபதிகள் உத்தரவிட்டனர்.
இதையும் படிங்க: 'சுங்கச்சாவடிகளில் கட்டணம் வசூலிக்க தடை கோரிய வழக்கு' - உயர் நீதிமன்றம் தள்ளுபடி
