சென்னை: திருவல்லிக்கேணி அயோத்தி நகர் குடிசை மாற்றுவாரியத்தில் வசித்துவருபவர் செந்தில். இவர் தனியார் நிறுவனத்தில் வாகன ஓட்டுநராகப் பணியாற்றிவந்தார். செந்தில் நேற்று (டிசம்பர் 08) தனது நண்பரான ஸ்டெல்லின் (31) என்பவரை தனது வீட்டிற்கு அழைத்து, மொட்டை மாடியில் அமர்ந்து மது அருந்தியுள்ளனர். பிறகு செந்தில் அங்கேயே உறங்கியதாகக் கூறப்படுகிறது.
குடிபோதையில் இருந்த ஸ்டெல்லின் மட்டும் மாடியில் நின்றுகொண்டிருந்தபோது வீட்டில் இருந்த வளர்ப்பு நாய் ஒன்று ஸ்டெல்லின் அருகே வந்துநின்றுள்ளது. அப்போது அளவுக்கதிகமான போதையில் இருந்த ஸ்டெல்லின் திடீரென நாயை தூக்கி மாடியிலிருந்து கீழே வீசினார். இதில் நாய் தலை சிதறி சம்பவ இடத்திலேயே உயிரிழந்தது.
நாயின் அலறல் சத்தம் கேட்டு ஓடிவந்த அதே குடியிருப்பைச் சேர்ந்த நாயின் உரிமையாளரான பிரவீன் குமார், நாயை வீசிக்கொன்ற நபர் குறித்து காவல் கட்டுப்பாட்டு அறைக்குத் தகவல் தெரிவித்தார். பின்னர், சம்பவ இடத்திற்கு வந்த மெரினா காவல் துறையினர், ஸ்டெல்லினை கைதுசெய்தனர்.
அலட்சியம் காட்டிய காவல் துறை
இது குறித்து செய்தியாளரிடம் பேசிய நாயின் உரிமையாளரான பிரவீன் குமார், “எனது 5 வயது மகளுக்காக 20 ஆயிரம் ரூபாய் கொடுத்து சிப்பி பாறை ரக நாயை வாங்கிக் கொடுத்தேன். டெமி என்ற பெயர் வைத்துச் செல்லமாக கடந்த ஓர் ஆண்டாக நாயை வளர்த்துவந்தோம்.
குடிபோதையில் இருந்த ஸ்டெல்லின் என்பவர் நாயை தூக்கி வீசிக் கொலை செய்தபோது அவரைப் பிடித்து வைத்து காவல் கட்டுப்பாட்டு அறைக்குத் தகவல் கொடுத்தோம். ஆனால், காவல் துறையினர் அலட்சியமாக நாளை வந்து புகார் கொடுக்குமாறு தெரிவித்தனர்.
நடவடிக்கை எடுத்த ப்ளூ கிராஸ்
நாயை கொலை செய்தவருக்கு உரிய தண்டனை கிடைக்க போராட முடிவுசெய்து உடனடியாக ப்ளூ கிராஸ் அமைப்பைச் சேர்ந்த நிர்வாகிகளை அலைந்து தேடினேன். அவர்கள் உதவியுடன் காவல் உயர் அலுவலர்கள் மூலம் வழக்கானது மெரினா காவல் நிலையத்தில் பதிவுசெய்யப்பட்டது.
விலங்குகளைத் தவறாகக் கையாண்டு துன்புறுத்தல், விலங்குகளைத் துன்புறுத்தி கொல்லுதல், விலங்கு வதைத் தடுப்புச் சட்டம் உள்ளிட்ட மூன்று பிரிவுகளின்கீழ் நாயைக் கொன்ற ஸ்டெல்லின் மீது காவல் துறையினர் வழக்குப்பதிவு செய்து சிறையில் அடைத்துள்ளனர்” எனத் தெரிவித்தார்.
இதையும் படிங்க: 100 ரூபாய் தகராறு: கட்டடத் தொழிலாளி அடித்துக் கொலை
