சென்னை உயர் நீதிமன்றத்தில் இமானுவேல் என்பவர் தாக்கல் செய்துள்ள மனுவில், ‘கரோனா வைரஸ் காரணமாக முதல்கட்டமாக 21 நாள்கள் என்று கூறி கடந்த மார்ச் 24ஆம் தேதி முதல் ஊரடங்கு அறிவிக்கப்பட்டது. இந்த ஊரடங்கை படிப்படியாக நீட்டித்து, தற்போது மே 31ஆம் தேதிவரை நீட்டிக்கப்பட்டுள்ளது.
இதனால் பலர் வருவாய் இழந்து வறுமையில் உள்ளனர். குறிப்பாக, குறைவான வருவாய் பெறுபவர்கள், கடும் சிரமத்திற்கு உள்ளாகியுள்ளனர். இந்த வைரஸ் பரவாமல் தடுக்க சீனா, இத்தாலி போன்ற நாடுகள் முழு ஊரடங்கை அறிவித்தது.
ஆனால், தென் கொரியா, ஸ்வீடன் போன்ற நாடுகள் முழு ஊரடங்கை அறிவிக்காமல், வைரஸ் தொற்று பரவாமல் தடுத்தது. எனவே, உலக நாடுகள் இந்த வைரஸுக்கு எதிராக இரு விதமான நடவடிக்கைகளை எடுத்துள்ளன.
மேலும், கரோனா வைரஸுக்கு தடுப்பு மருந்து கண்டுபிடிக்கும்வரை கரோனா நம்முடன்தான் இருக்கும். ஒருவருக்கு ஒருவர் தகுந்த இடைவெளியைக் கடைப்பிடிக்க வேண்டும். முகக்கவசம் அணியவேண்டும் என்பது போன்ற நிபந்தனைகளையும் அரசு விதித்துள்ளது.
இதை கடைப்பிடித்தாலே வைரஸ் தொற்றிலிருந்து நாம் தப்பிக்கலாம். எனவே, ஊரடங்கை நீட்டித்துக் கடந்த 17ஆம் தேதி மத்திய அரசு பிறப்பித்த உத்தரவை ரத்து செய்யவேண்டும்’ என்று கோரியுள்ளார். இந்த வழக்கு அவசர வழக்குகளை விசாரணை செய்யும் நீதிபதிகள் முன்பு விரைவில் விசாரணைக்கு வர உள்ளது.
இதையும் படிங்க: தமிழ்நாட்டிற்கு 4 சிறப்பு ரயில்கள்! தென்னக ரயில்வே நிர்வாகம் முடிவு
