தென் ஆப்பிரிக்கா நாட்டில் உருவாகியுள்ள உருமாறிய ஒமைக்ரான் வைரஸ் தற்போது சீனா, நியூசிலாந்து, ஹாங்காங், ஐரோப்பிய நாடுகள், பிரிட்டன், பிரேசில், வங்கதேசம், போஸ்வானா, மொரீசியஸ், ஜிம்பாப்வே, சிங்கப்பூர், இஸ்ரேல் ஆகிய நாடுகளிலும் பரவத் தொடங்கியுள்ளது.
இதனால் தமிழ்நாடு அரசு ஒமைக்ரான் வைரஸ் பரவாமல் தடுப்பதில் போா்க்கால அடிப்படையில் அதிதீவிர நடவடிக்கைகளை எடுத்துவருகிறது. தென் ஆப்பிரிக்கா, சீனா, ஐரோப்பிய நாடுகள், இஸ்ரேல், சிங்கப்பூா் உள்ளிட்ட 12 நாடுகளிலிருந்து நேரடி விமானங்களிலும், விமானங்கள் மாறி மாற்று விமானங்களிலும் தமிழ்நாட்டிற்கு வருகைபுரிகின்றனர்.
சென்னை, திருச்சி, மதுரை, கோவை ஆகிய பன்னாட்டு விமான நிலையங்களுக்கு வருபவா்களை அந்தந்த விமான நிலையங்களிலேயே நிறுத்திவைத்து, ஆர்டி-பிசிஆர் டெஸ்ட் எடுக்கப்பட்டுவருகிறது.
இந்த நிலையில் நேற்று நள்ளிரவு 12 மணியிலிருந்து ஒமைக்ரான் பரவிவரும் நாடுகளிலிருந்து சென்னை வந்த 350-க்கும் மேற்பட்ட பயணிகளுக்கு எடுக்கப்பட்ட ஆர்டி-பிசிஆர் பரிசோதனையில் யாருக்கும் தொற்று பாதிப்பு எதுவும் ஏற்படவில்லை எனத் தெரிவிக்கப்பட்டுள்ளது.
இருந்தாலும் அவர்களை வீட்டுத் தனிமையில் இருக்க அறிவுறுத்தப்பட்டுள்ளது. மேலும் இன்று அதிகாலையில் வெளிநாடுகளிலிருந்து விமானத்தில் சென்னை வந்த பயணிகள் யாருக்கும் தொற்று பாதிப்பு ஏற்படவில்லை.
இன்று காலை 7 மணி, 8 மணி அளவில் சிங்கப்பூரிலிருந்து இரண்டு விமானங்களில் வந்த 150 பயணிகளுக்கு ஆர்டி-பிசிஆர் பரிசோதனைகள் எடுக்கப்பட்டு விமான நிலையத்தில் தனிமைப்படுத்தப்பட்டுள்ளனர்.
ஆறு மணி நேரத்திற்குப் பிறகு பரிசோதனை முடிவுகள் அறிவிக்கப்படும் எனவும் தெரிவிக்கப்பட்டுள்ளது. மேலும் மற்ற நாடுகளிலிருந்து சென்னை வரும் பணிகளுக்கு யாருக்காவது அறிகுறிகள் தென்பட்டால் அவர்களுக்கு உடனடியாக ஆர்டி-பிசிஆர் பரிசோதனை செய்யப்படுகிறது.
இதையும் படிங்க: தமிழ்நாட்டில் ஒமைக்ரான் பாதிப்பு கண்டறியப்படவில்லை - மா.சுப்பிரமணியன்
