கரோனா வைரஸ் குறித்த விழிப்புணர்வை ஏற்படுத்துவதற்காக, நாடு முழுவதும் பள்ளி மாணவர்கள் இடையேயான ஓவியப்போட்டிக்கு இந்திய அஞ்சல் துறையால் ஏற்பாடு செய்யப்பட்டது. இதில் கலந்து கொண்டு வெற்றி பெற்றவர்களின் ஓவியங்களுடன் கூடிய சிறப்பு அஞ்சல் உறை வெளியிடும் நிகழ்ச்சி, அண்ணா சாலையில் உள்ள தலைமை அஞ்சல் நிலையத்தில் இன்று நடைபெற்றது.
இதில் கலந்து கொண்டு சிறப்பு அஞ்சல் உறையை வெளியிட்ட மாவட்ட ஆட்சியர் சீதாலட்சுமி, வெற்றி பெற்ற மாணவர்களுக்கான பரிசுகளையும் வழங்கினார். பின்னர் செய்தியாளர்களை சந்தித்த முதன்மை அஞ்சல் தலைவர் குமார், " இந்தியா முழுவதும் இந்திய அஞ்சல் துறையால் பள்ளிக் குழந்தைகள் மத்தியில் ஓவியப் போட்டியில் 324 பேர் கலந்து கொண்டனர். பல்வேறு பிரிவுகளில் மாணவர்கள் தேர்ந்து எடுக்கப்பட்டு அவர்களுக்கு பரிசுகள் வழங்கப்பட்டன.
கரோனா காலத்தில் தூய்மைப் பணியாளர்கள், மருத்துவர்கள் மட்டுமல்லாமல் அஞ்சல் துறையும் அனைத்து இடங்களிலும் இயங்கிக்கொண்டு இருந்தது. இந்த கடினமான சூழலிலும் நாட்டில் பல்வேறு இடங்களுக்கு மருந்து மாத்திரைகள் விநியோகம் செய்யப்பட்டுள்ளது. வங்கிகள் இல்லாத நிலையில், மக்களுக்காக வங்கியில் இருக்கும் பணத்தை அஞ்சல் மூலமாக அவர்களுக்கு வழங்கி வந்தோம். கரோனாவிற்கு எங்கள் ஊழியர்களையும் நாங்கள் இழந்துள்ளோம். ஊரடங்கு காலத்தில் அஞ்சல் துறையில் 20% புதிய பணியாளர்கள் இணைந்துள்ளனர் " எனக் கூறினார்.
இதையும் படிங்க: பள்ளிகளில் வகுப்பு நடந்தால் ஒழுங்கு நடவடிக்கை: மெட்ரிகுலேஷன் பள்ளிகள் இயக்குநர் எச்சரிக்கை
