மருத்துவ மேற்படிப்பில் உள்ள காலியிடங்களுக்கு கலந்தாய்வு நடத்தி மாணவர் சேர்க்கை நடத்தக்கோரி, மருத்துவர்கள் அரவிந்த், கீதாஞ்சலி, சந்தோஷ் ஆகியோர் உயர் நீதிமன்றத்தில் மனுக்கள் தாக்கல் செய்திருந்தனர்.
இந்த வழக்குகளை விசாரித்த நீதிபதி ஆனந்த் வெங்கடேஷ், தமிழகத்தில் நடப்பு கல்வியாண்டில் காலியாக இருந்த 74 மருத்துவ மேற்படிப்பு இடங்கள், தனியார் கல்லூரிகளுக்கே மீண்டும் வழங்கப்பட்டுள்ளதை சுட்டிக்காட்டினார். மேலும், ஆண்டுதோறும் காலியிடங்களை நிரப்புவதற்கு தனியார் மருத்துவக் கல்லூரிகள், குறைந்த மதிப்பெண்கள் பெற்ற மாணவர்களை சேர்க்கும் நடைமுறைகளை பின்பற்றி வருகின்றன எனக்கூறிய நீதிபதி, தகுதி இல்லாத விண்ணப்பதாரர்களுக்கு மாணவர் சேர்க்கை வழங்குவதை தொடர அனுமதித்தால், அது தகுதியான மாணவர்களுக்கு அநீதி அழைப்பதற்கு சமம் எனவும் குறிப்பிட்டார்.
தகுதி இல்லாமல் பணம் கொடுத்து மருத்துவ மேற்படிப்பு இடங்களை விலைக்கு வாங்கும் மாணவர்களால், இந்த சமுதாயத்திற்கு பெரிய ஆபத்து ஏற்பட்டுள்ளதாக வேதனை தெரிவித்த நீதிபதி, மருத்துவ படிப்புகளுக்கு பணம், மேலிட தொடர்பு மற்றும் அதிகாரம் ஆகியன முக்கிய காரணியாக இருக்கக்கூடாது என்றும், தகுதி மட்டுமே காரணியாக இருக்க வேண்டும் எனவும் அறிவுறுத்தினார்.
அரசுத் தரப்பில் தாக்கல் செய்யப்பட்டுள்ள ஆவணங்களையும் புள்ளி விவரங்களையும் பார்க்கும்போது, மருத்துவக் கல்வி இயக்குநரக அதிகாரிகளுக்கும், தனியார் கல்லூரிகளுக்கும் இடையிலான சதியின் பின்னணியில் உள்ள நபர்கள் யார்?, கல்லூரிகள் வசூலித்த பணம் எவ்வளவு என்ற விவரங்கள் வெளிச்சத்திற்கு வரும் எனத் தெரிவித்து, இந்த முறைகேடு தொடர்பாக சிபிசிஐடி விசாரணை நடத்த தமிழக டிஜிபிக்கு நீதிபதி ஆனந்த் வெங்கடேஷ் உத்தரவிட்டார்.
தொடர்ந்து, இவ்வழக்கின் விசாரணை குறித்த அறிக்கையை வரும் ஜனவரி 30 ஆம் தேதி தாக்கல் செய்ய வேண்டும் என உத்தரவிட்ட நீதிபதி, வழக்கை பிப்ரவரி 1 ஆம் தேதிக்கு தள்ளிவைத்தார்.
இதையும் படிங்க: மதுரை எய்ம்ஸ் மருத்துவமனையின் தலைவரை நியமித்தது மத்திய அரசு!
