சட்டப்பேரவை கேள்வி நேரத்தின் போது பேசிய மக்கள் நல்வாழ்வுத்துறை அமைச்சர் விஜயபாஸ்கர், ”முதலமைச்சர் எடப்பாடி பழனிசாமி மருத்துவப் படிப்பில் அரசு பள்ளி மாணவர்களுக்கு 7.5% இட இதுக்கீடு தந்து, மருத்துவ மாணவராகவும், அதிகமான மருத்துவக் கல்லூரிகளை திறந்து மருத்துவராகவும் அவதாரம் எடுத்துள்ளார்.
விவசாயக் கடன்களை தள்ளுபடி செய்து ஏழை விவசாயியாகவும், அனைத்து மாணவர்களும் தேர்ச்சி என அறிவித்து, தேர்வு எழுதி காத்திருக்கும் மாணவனாகவும், குடி மராமத்து பணிகளை மேற்கொண்டு, சாதாரண குடிமகன் அவதாரமும், அதேபோல கரோனா காலகட்டத்தில் முன்களப் பணியாளராக அவதாரம் எடுத்தும், மேலும், மருத்துவத்துறையில் மகப்பேறு திட்டத்தை செயல்படுத்தி ஒரு தாயாகவும் அவதாரம் எடுத்துள்ளார்.
உழைப்பால் திறமையால், அனுபவங்களால் எடுத்த காரியங்களில் நிலைகுலையாமல் செய்து முடிக்கும் அவதார புருஷர்களாக முதலமைச்சரும், துணை முதலமைச்சரும் திகழ்கிறார்கள். மீண்டும் 2021ல் வெற்றி பெற்று முதலமைச்சராக, துணை முதலமைச்சராக இருவரும் அவதாரம் எடுப்பார்கள்” எனப் புகழ்ந்தார்.
அவரைத் தொடர்ந்து பேசிய தமிழ் ஆட்சி மொழி மற்றும் பண்பாட்டுத்துறை அமைச்சர் மாஃபா.பாண்டியராஜன், ”அமைச்சர் விஜயபாஸ்கர் பேசும்போது, முதலமைச்சர் 8 அவதாரங்களை எடுத்ததாக கூறினார். ஆனால் அவர் 9 ஆவதாக தமிழ் மொழியை காத்து, தமிழ் மொழிக் காப்பாளர் என்கிற அவதாரத்தையும் எடுத்துள்ளார்” என்றார்.
இதையும் படிங்க: தேர்தல் செலவிற்காக ரூ.102.38 கோடி நிதி! - தமிழக அரசு ஒதுக்கீடு!
