பிற்படுத்தப்பட்டோர் மற்றும் சிறுபான்மையினர் நலத் துறைக்கான அறிவிப்புகள்!

சென்னை: பிற்படுத்தப்பட்டோர் மற்றும் சிறுபான்மையினர் நலத் துறை அறிவிப்புகளை அமைச்சர் வளர்மதி இன்று சட்டப்பேரவையில் வெளியிட்டார்.

பிற்படுத்தப்பட்டோர் மற்றும் சிறுபான்மையினர் நலத் துறை அறிவிப்புகளை அமைச்சர் வளர்மதி சட்டப்பேரவையில் இன்று வெளியிட்டார்.

1. 1,301 பிற்படுத்தப்பட்டோர், மிகப் பிற்படுத்தப்பட்டோர், சீர்மரபினர் மற்றும் சிறுபான்மையினர் நல விடுதிகளுக்கு மின் அரைப்பான்கள் 84 லட்சத்து 57 ஆயிரம் ரூபாய் செலவில் வழங்கப்படும்.
2. விடுதிகளில் பணிபுரியும் காப்பாளர், காப்பாளினிகளுக்கு, அண்ணா மேலாண்மை நிலையம் மூலமாக மூன்று நாள்கள் பணியிடைப் பயிற்சி 38 லட்சத்து 22 ஆயிரம் ரூபாய் செலவில் வழங்கப்படும்.
3. விடுதி தூய்மைப் பணியாளர்களுக்கு சுகாதாரப் பாதுகாப்பு உபகரணங்கள் கையுறை, முகமூடி, பாதுகாப்பு காலுறைகள் ஆகியவை 15 லட்சத்து 60 ஆயிரம் ரூபாய் செலவில் வழங்கப்படும்.
4. விடுதிக்கு மாணவியரின் எண்ணிக்கையை 50 லிருந்து 100ஆக உயர்த்த, நான்கு லட்சத்து 75 ஆயிரம் ரூபாய் செலவில் கட்டடங்கள் தரம் உயர்த்தப்படும்.
5. முதற்கட்டமாக 200 பிற்படுத்தப்பட்டோர், மிகப் பிற்படுத்தப்பட்டோர், சீர்மரபினர் மற்றும் சிறுபான்மையினர் விடுதிகளுக்கு குளிருடன் கூடிய குடிநீர் சுத்திகரிப்பு கருவிகள் இரண்டு கோடி ரூபாய் செலவில் வழங்கப்படும்.
6. கள்ளர் சீரமைப்புப் பள்ளிகளுக்கு மேசைகள் ஒரு கோடியே 37 லட்சத்து ஐம்பதாயிரம் ரூபாய் செலவில் வழங்கப்படும்.
7. கள்ளர் சீரமைப்புப் பள்ளி கட்டடங்களில் சாய்தள வசதி இல்லாத 199 கட்டடங்களில், இரண்டு கோடியே 40 லட்சத்து 79 ஆயிரம் செலவில் சாய்தளம் வசதி அமைத்துத் தரப்படும்.
8. விடுதிகளில் பணிபுரியும் தூய்மைப் பணியாளர்களுக்குச் சிறப்பு கால முறை ஊதியம் வழங்கப்படும்
9. கபரஸ்தான், அடக்கஸ்தலம் அமைப்பதற்கு நிலம் கையகப்படுத்த ஒரு கோடி ரூபாய் நிதியுதவி வழங்கப்படும்.
10. 25 கள்ளர் சீரமைப்புப் தொடக்கப் பள்ளிகளில் மழலையர் வகுப்புகளும், 25 கள்ளர் சீரமைப்புப் மேல்நிலைப் பள்ளிகளில் 6ஆம் வகுப்பில் ஆங்கில வழிக்கல்வி ஒரு கோடியே 50 லட்சம் ரூபாய் செலவில் தொடங்கப்படும்.
11. ஆறு கோடியே 42 லட்சத்து 96 ஆயிரம் ரூபாய் செலவில், விடுதிகளில் தங்கிப் பயிலும் மாணவ, மாணவியருக்குத் தனித்திறன் வளர்க்கும் பயிற்சியும், ஆங்கில பேச்சாற்றல் பயிற்சியும் அளிக்கப்படும்.
12. நான்கு கோடியே 25 லட்சம் ரூபாய் செலவில், 425 விடுதிகளுக்கு கண்காணிப்புப் படக்கருவிகள் வழங்கப்படும்.
13. 45 லட்சம் ரூபாய் செலவில் மாநில சிறுபான்மையினர் ஆணையத்தின் அலுவலகம் நவீனப்படுத்தப்படும்.
14. சிறுபான்மையினர் உரிமை நாள் விழா கொண்டாட வழங்கப்படும் நிதியினை உயர்த்தி வழங்குவதற்காக ரூபாய் நான்கு லட்சத்து ஆறாயிரம் செலவிடப்படும்.
15. கள்ளர் சீரமைப்பு அலுவலகம், 60 கள்ளர் சீரமைப்பு உயர்நிலை மற்றும் மேல்நிலைப் பள்ளிகளுக்கு கணினிகளும், இன்னபிற உபகரணங்கள் 96 லட்சத்து 41 ஆயிரம் ரூபாய் செலவில் வழங்கப்படும்
16. மூன்று கோடி ரூபாய் செலவில் 25 விடுதிகளுக்குச் சுற்றுச்சுவர் கட்டப்படும்.