தமிழ்நாடு - மலேசியா இடையே கல்வி பரிமாற்ற நிகழ்வுகள் நடைபெற்றுவருகின்றன. அதன் ஒரு பகுதியாக மலேசிய நாட்டின் நெகிரி செம்பிலான் மாநிலத்தில் உள்ள தமிழ் பள்ளிகளை சேர்ந்த தலைமை ஆசிரியர்கள் மற்றும் கல்வி அலுவலர்கள் அடங்கிய 19 பேர் கொண்ட குழு தமிழ்நாடு வந்துள்ளது.
அந்த குழுவினர் தமிழ்நாட்டில் உள்ள பள்ளிகளில் மாணவர்களுக்கு கற்பித்தல் பணிகள் எவ்வாறு மேற்கொள்ளப்படுகின்றன என்றும், அதன் முறைகள் குறித்தும் கண்டறிந்துவருகின்றனர். இந்த முறைகளை மலேசியாவில் தமிழ் வழியில் படிக்கும் மாணவர்களுக்கு அறிமுகப்படுத்துவதற்கான வாய்ப்புகள் குறித்தும் ஆலோசித்துவருகின்றனர்.
அதன்படி, சென்னை எம்ஜிஆர் நகர் அரசு மேல்நிலைப் பள்ளிக்கு வருகை தந்த மலேசிய நாட்டின் கல்விக் குழுவினர் மாணவர்களுக்கு கற்பிக்கும் முறையை கண்டறிந்தனர். அப்போது, ஏழாம் வகுப்பு மாணவர்களுக்கு தமிழ் பாடத்தில் ஒரு பாடலை செயல்முறை விளக்கத்துடன் ஆசிரியர் கற்பித்தார். பின்னர், கபடி ,சிலம்பம், எறிபந்து, பாக்சிங் போன்ற மாணவர்களின் இணைச் செயல்பாடுகளையும் அவர்கள் கண்டு ரசித்தனர். தமிழ் கற்பித்தல், ஆங்கிலப் பேச்சு பயிற்சி போன்றவற்றையும் அவர்கள் கேட்டு தெரிந்துகொண்டனர்.
பள்ளியில் ஆசிரியை ஒருவர் தமிழ் திரைப்பாடல்களை பாடியபொழுது, அவருடன் சேர்ந்து மலேசியாவிலிருந்து வந்த ஆசிரியரும் தமிழில் நன்றாகப் பாடலைப் பாடி அசத்தினார்.
பின்னர் இதுகுறித்து, மலேசிய நாட்டின் தமிழ்வழி பள்ளி தலைமையாசிரியர் மோகன் கோவிந்தன் கூறும்போது, ” தமிழ்நாட்டில் மாணவர்களுக்கு பல்வேறு நவீன தொழில்நுட்பங்களை பயன்படுத்தி கற்பித்து வருகின்றனர். மலேசியாவில் இலக்கணம், இலக்கியம் போன்றவற்றிற்கு முக்கியத்துவம் அளித்து கற்பித்துவருகிறோம். செயல்முறையுடன் தமிழர் பண்பாடுகளுக்கு முக்கியத்துவம் அளித்து கற்பிக்கும்பொழுது நமது கலாசாரம் தொடர்ந்து பாதுகாக்கப்படும். மலேசியாவிலும் நவீன தொழில்நுட்பங்களுக்கு ஏற்ப கற்றல், கற்பித்தல் முறைகள் மேற்கொள்ளப்படுகின்றன. 21ஆம் நூற்றாண்டின் சூழ்நிலைக்கேற்ப பாடத்திட்டங்கள் மாற்றம் செய்யப்பட்டுவருகிறது “ என்றார்.
தொடர்ந்து, மலேசியாவிலிருந்து வந்திருந்த தலைமை ஆசிரியர் கிருஷ்ணகுமார் கூறும்போது, ” தமிழ்நாட்டில் கல்வி முறையினை தெரிந்துகொள்வதற்காக மலேசியாவிலிருந்து 50 ஆசிரியர்களை தமிழ்நாட்டிற்கு அனுப்பி வைக்க உள்ளோம் ” என கூறினார்.
மேலும், மலேசியா நாட்டின் கல்வி அலுவலர் அமிர்தலிங்கம் கூறும்போது, ” தமிழ்நாட்டில் கல்வி கற்பிக்கும் முறை மிகவும் சிறப்பாக அமைந்துள்ளது. நாங்கள் மாணவர்களுக்கு கல்வி கற்பிக்கும் முறையினை தெரிந்துகொண்டு மலேசியா நாட்டில் அதனை அமல்படுத்துவது குறித்து ஆலோசிக்க உள்ளோம் ” என தெரிவித்தார்.
தமிழ்நாட்டில் பள்ளிகளில் வசதிகள் குறைவாக இருந்தாலும், மாணவர்களை தகுதி படைத்தவர்களாக ஆசிரியர்கள் உருவாக்கியுள்ளதாகவும், அதேபோல் மலேசியாவிலுள்ள தமிழ்வழி மாணவர்களையும் பன்மொழி திறனுள்ள மாணவர்களாக உருவாக்குவோமென மலேசிய நாட்டுக் கல்வி குழுவினர் உறுதிபட தெரிவித்தனர்.
இதையும் படிங்க: தீவுத்திடலில் தீ இல்லாத சமையல் போட்டி- தமிழ்நாடு சுற்றுலா வளர்ச்சி கழகம்
