சென்னை நங்கநல்லூர் குடியிருப்பு பகுதியில் நிலத்தடி நீரை சட்டவிரோதமாக எடுத்து, பெரும் தொகைக்கு சிலர் விற்பனை செய்வதாக இளையராஜா என்பவர், சென்னை உயர் நீதிமன்றத்தில் பொதுநல வழக்கு தொடர்ந்திருந்தார். இதை விசாரித்த உயர் நீதிமன்றம் வழக்கறிஞர் குழு நியமித்து அறிக்கை அளிக்க உத்தரவிட்டது.
அதன்பின் விசாரணை குழு அளித்த அறிக்கையில், நங்கநல்லூர் பகுதியில் சட்டவிரோதமாக நிலத்தடி நீர் எடுத்து விற்பனை செய்யும் கும்பலுக்கு, உடந்தையாக பழவந்தாங்கல் காவல் ஆய்வாளர் நடராஜன் இருப்பதாகவும், அப்பகுதியில் சட்ட விரோதமாக நிலத்தடி நீர் எடுக்கப்படுவதாக புகைப்பட ஆதாரங்களோடு தெரிவிக்கப்பட்டது. இதன் காரணமாக காவல் ஆணையர் அறிக்கை தாக்கல் செய்ய நீதிமன்றம் உத்தரவிட்டிருந்தது.
இந்நிலையில் இந்த வழக்கில் இன்று சென்னை காவல் ஆணையர் ஏ.கே. விஸ்வநாதன் அறிக்கைத் தாக்கல் செய்தார். அதில் நிலத்தடி நீர் எடுப்பவர்கள் அப்பகுதியினரை மிரட்டுவதாகவும், காவல் நிலையத்தில் புகார் அளிப்பதில்லை எனவும் தெரிவிக்கப்பட்டிருந்தது.
காவல் ஆணையரின் இந்த அறிக்கையால் அதிருப்தி அடைந்த நீதிபதிகள், சட்டவிரோதமாக நிலத்தடி நீர் உறிஞ்சுவதை தடுக்கவில்லை, நீர் எடுத்து செல்பவர்களுக்கு காவல் ஆய்வாளர் உடந்தையாக இருந்துள்ளார்.
அவர் மீது நடவடிக்கை எடுக்கவில்லை, மக்கள் மிரட்டப்பட்டுள்ளனர். அதிலும் நடவடிக்கை எடுக்கவில்லை, வருவாய்த் துறை, ஆர்.டி.ஒ, காவல் துறை, மாவட்ட ஆட்சியர் என அதிகாரம் கொண்ட யாரும் எந்த நடவடிக்கையும் எடுக்கவில்லை என நீதிபதிகள் வேதனை தெரிவித்தனர்.
மேலும், இந்த வழக்கின் விசாரணையை சிபிஐ போன்ற வேறு விசாரணை அமைப்புகளுக்கு மாற்ற நேரிடும் எனவும் எச்சரித்தனர். அரசு தரப்பில், காவல் ஆணையர் பதிலளிக்க கால அவகாசம் கேட்கப்பட்டது. இதையடுத்து காவல் துறை தரப்புக்கு கால அவகாசம் வழங்கி வழக்கை வரும் 26ஆம் தேதிக்கு ஒத்தி வைத்தனர்.
