பேரிடர் மேலாண்மை கல்வி பயிலும் மாணவர்களுக்கான கருத்தரங்கம் சென்னை வானிலை ஆய்வு மையத்தில் இன்று நடைபெற்றது. இக்கருத்தரங்கத்தில் கலந்துகொண்டு பேசிய நதிகள் சீரமைப்பு மற்றும் நீர்வள ஆதார மையத் தலைவர் சத்தியகோபால் ஐஏஎஸ், “இயற்கை சீற்றங்களில் நாம் பல்வேறு படிப்பினைகளை பெற்றுள்ளோம். அதனால் அந்தப்பேரிடர்களை நாம் மிகச் சிறப்பாக எதிர்கொள்ள முடிந்தது. நாம் எதிர்கொண்ட சீற்றங்களில் என்ன நடக்கும் எனத் தெளிவான விபரங்களை நாம் முன்கூட்டியே அறிந்திருந்தோம். ஆபத்தான இடங்களை நான்காகப் பிரித்து, அதனடிப்படையில் மீட்பு மற்றும் முன்னெச்சரிக்கை நடவடிக்கைகளை மேற்கொண்டதால் ஆபத்துகளில் இருந்து மக்களைக் காக்க முடிந்தது.
எங்கே, என்ன நடக்கிறது. நீங்கள் வசிக்கும் பகுதியில் என்ன நிலை என அனைத்தையும் அறிந்துகொள்ள டி.என். ஸ்மார்ட் (tnsmart) செயலியை பதிவிறக்கம் செய்து தெரிந்துகொள்ள முடியும். இந்தியாவில் இயற்கைப் பேரிடர்களை எதிர்கொள்வதில் முதல் மாநிலமாக தமிழகம் திகழ்கிறது.
மழைநீர் எங்கு போக நினைக்கிறதோ அங்கே அதனைப் போக விட வேண்டும். ஆனால், தண்ணீரின் பாதைகளில் நாம் வீடுகளை கட்டிவிட்டதால் அதற்கு வழி தெரியாமல் வெள்ளமாக வீடுகளை முற்றுகையிடுகிறது. அவை தன் பாதைகளைத் தேடுகிறது என்பதே உண்மை” என்றார்.
இதைத்தொடர்ந்து செய்தியாளர்களிடம் பேசிய வானிலை ஆய்வு மைய தென்மண்டலத் தலைவர் பாலச்சந்திரன், கடந்த வடகிழக்கு பருவமழையில் இயல்பை விட அதிகமான மழை நமக்கு கிடைத்துள்ளது என்றார். அரப்பிக்கடலில் ஏற்பட்ட புயல்களால் தமிழகத்திற்கு பாதிப்புகள் குறைவாக இருந்தது என்ற பாலச்சந்திரன், கோடைக்காலம் குறித்த தகவல்கள் அவ்வப்போது தெரிவிக்கப்படும் என்றார்.
இதையும் படிங்க: ஆசிரியர்கள் நியமனத்திலும் மத்திய அரசிற்கு தவறான தகவல்: பள்ளிக்கல்வித்துறை மீது குற்றச்சாட்டு!
