ஈரோடு சூரம்பட்டியைச் சேர்ந்த செல்லப்பன் சென்னை உயர்நீதிமன்றத்தில் பொதுநல மனு ஒன்றை தாக்கல் செய்தார்.
அந்த மனுவில் கூறியிருப்பதாவது, அரசு பேருந்துகளில் (ஓட்டுநர்,நடத்துநர் உட்பட) 55+2 பயணிகளையும், மினி பேருந்தில் (ஓட்டுநர், நடத்துநர் உட்பட) 25+2 பேரும், ஷேர் ஆட்டோவில்(ஓட்டுநர் உட்பட) 5+1 மட்டுமே பயணம் செய்ய வேண்டும் என்ற சாலை விதிகள் உள்ளது.
ஆனால் அனுமதிக்கப்பட்ட அளவை விட கூடுதலாக இரண்டு மடங்கு பயணிகள் ஏற்றப்படுவதால் பயணிகளின் உயிருக்கு ஆபத்தாக ஏற்படுவதோடு, படிக்கட்டில் பயணம் செய்யும் நிலைக்கு பயணிகள் தள்ளப்படுகின்றனர்.
இதனால், இருசக்கர வாகனம் ஓட்டுபவர்களும் பாதிக்கப்பட்டு அடிக்கடி சாலைகளில் விபத்து ஏற்படுகிறது.
மேலும், அளவுக்கு அதிகமாக பயணிகளை ஏற்றுவதால் அரசுக்கு நாளொன்றுக்கு 5 கோடி ரூபாய் சாலை வரி இழப்பு ஏற்படுவதால்,
பேருந்து மற்றும் ஆட்டோக்களில் அதிக பயணிகள் ஏற்றிச் செல்ல தடை விதிக்க வேண்டும் என மனுவில் குறிப்பிட்டிருந்தார்.
இந்த மனுவை விசாரித்த நீதிபதிகள் இதுசம்பந்தமாக விரிவான அறிக்கையை தாக்கல் செய்ய தமிழக அரசுக்கு உத்தரவிட்டு, வழக்கு ஏப்ரல் 8 ம் தேதிக்கு தள்ளிவைத்தனர்.
