தமிழ்நாடு சத்துணவு ஊழியர் சங்கம், சமூக நலன் மற்றும் சத்துணவு திட்ட ஆணையருக்கு அனுப்பியுள்ள கடிதத்தில், ”கரோனா தொற்று காரணத்தால் சத்துணவு மையங்களுக்கு மார்ச் 14ஆம் தேதி முதல் விடுமுறை விடப்பட்டது. நுகர்பொருள் வாணிபக் கழகத்தின் மூலம் சத்துணவு மையங்களுக்கு பிப்ரவரி மாதம் வழங்கப்பட்ட, பருப்பு, பச்சைப்பயறு, கொண்டைக்கடலை ஆகியவை 4 மாதங்கள் ஆனதால், வண்டு உருவாகி வீணாகியுள்ளது. சமையல் எண்ணையும் கெட்டுப்போயுள்ளது.
வீணான பொருட்களை தொடர்ந்து பள்ளி சத்துணவு மையங்களிலேயே இருப்பதால் சுகாதாரமற்ற நிலை ஏற்படும் அவலம் உள்ளது. எனவே, 144 தடை உத்தரவு காலம் என்பதால், உணவுப் பொருட்களை அமைப்பாளர்கள் கொண்டு போய் கொடுக்க இயலாத சூழல் உள்ளது. ஆகையால், நேரில் சென்று பொருட்களை வாகனம் வைத்து பெற்றுக்கொண்டு, பள்ளி திறக்கும் போது திரும்ப வழங்க வேண்டும் ” எனக் கூறியுள்ளனர்.
இது குறித்து சமூகநலத்துறை அலுவலர்களிடம் கேட்டபோது, “சத்துணவு மையங்களில் தேங்கியுள்ள பொருட்களை நுகர்பொருள் வாணிபக் கழகத்தின் மூலம் எடுத்துச் செல்ல அறிவுறுத்தப்பட்டுள்ளது. சத்துணவிற்கு தேவையான உணவு பொருட்கள் பள்ளி திறப்பதற்கு 15 நாட்களுக்கு முன்னர் மையங்களுக்கு வழங்கப்படும். மேலும், மே மாதத்திற்குரிய சத்துணவு பொருட்களை வழங்க மத்திய அரசு உத்தரவிட்டுள்ளது. அதற்கான பணிகளும் நடைபெற்று வருகின்றன “ எனக் கூறினர்.
இதையும் படிங்க: வீடுதோறும் சென்று ஆய்வு மேற்கொண்ட சிறப்பு அலுவலர்
