சென்னை: போலாந்து நாட்டில் நடந்த உலக வில்வித்தை சாம்பியன்ஸ் போட்டியில் 52 நாடுகளிலிருந்து 500-க்கும் மேற்பட்ட வீரர்கள் கலந்து கொண்டனர். இதில், இந்திய நாட்டின் சார்பாக கலந்துகொண்ட கோயம்புத்தூரைச் சேர்ந்த ரிது வர்ஷினி என்ற 14 வயது சிறுமி தங்கப் பதக்கம் வென்றார்.
தங்கம் வென்ற சிறுமிக்கு வரவேற்பு
இதையடுத்து, போலாந்து நாட்டிலிருந்து டெல்லி வந்த வில்வித்தை வீரர்களை ஒன்றிய விளையாட்டுத்துறை அமைச்சர் அனுராக் தாக்கூர் பாராட்டினார்.
பின்னர் டெல்லியில் இருந்து சென்னைக்கு விமானம் மூலம் வந்த ரிது வர்ஷினியை தமிழ்நாடு வில்வித்தை சங்கச் செயலாளரும் இந்திய வில்வித்தை பயிற்சியாளர்கள் இயக்குநருமான ஷிஹான் உசைனி உள்ளிட்ட வில்வித்தை வீரர்கள் அவருக்கு மாலை அணிவித்து உற்சாகமாக வரவேற்றனர்.
இதையடுத்து செய்தியாளர்களைச் சந்தித்த ஷிஹான் உசைனி, 'முதல் முறையாக உலக வில்வித்தைப் போட்டி போலாந்து நாட்டில் நடந்தது. அந்தப் போட்டியில் 14 வயது நிரம்பிய தமிழ்நாட்டைச் சேர்ந்த ரிது வர்ஷினி உலக சாம்பியன் பட்டத்தைப் பெற்று திரும்பி வந்துள்ளார்.
இது இந்தியாவிற்கு மட்டுமில்லாமல் தமிழ்நாட்டிற்கும் சாதனையாகும். ரிது வர்ஷினிக்கும், பெற்றோருக்கும் பயிற்சியாளருக்கும் பாராட்டுக்களைத் தெரிவித்துக் கொள்கிறேன்’ என்றார்.
செய்தியாளர்களைச் சந்தித்த சிறுமி
பின்னர், தங்கப் பதக்கம் பெற்ற ரிது வர்ஷினி செய்தியாளர்களிடம் பேசுகையில், 'இது தான் முதல் வெற்றி, என்னுடைய வெற்றிக்கு நான் மட்டும் அல்ல, நிறையபேரின் உழைப்பும் உள்ளது. இதனால் நாங்கள் மிகுந்த மகிழ்ச்சியாக உள்ளோம்.
இப்போட்டியில் வெற்றி பெற்றது போல் சீனியர் போட்டியிலும் சாம்பியன்ஷிப் பட்டத்தை பெற ஆசைப்படுகிறேன். உலக வில்வித்தை சாம்பியன்ஸ் போட்டியில் 52 நாடுகள் கலந்து கொண்டன.
அரை இறுதிப் போட்டியில் இத்தாலியை வென்றோம். இறுதிப்போட்டியில் துருக்கியை வீழ்த்தி வெற்றி பெற்றோம்'' என்றார்.
இதையடுத்து, ரிது வர்ஷினியின் தந்தை செந்தில் பேசுகையில், ''வில்வித்தை போட்டியில் எனது மகள் வெற்றி பெற்றது மிகுந்த மகிழ்ச்சியை தருகிறது. இதற்கு காரணமாக இருந்த பயிற்சியாளர் யுவராஜுக்கு நன்றி. அடுத்த உலக சாம்பியன்ஷிப் போட்டிகளிலும் எனது மகள் பதக்கம் பெற வேண்டும். அதற்கு உறுதுணையாகப் பயிற்சியாளர் இருக்க வேண்டும்'' எனக் கேட்டுக்கொண்டார்.
இதையும் படிங்க: குத்துச்சண்டை: பதக்கங்களை வாங்கி குவித்த திருச்சி பாய்ஸ்!
