தமிழ்நாடு அரசுப் பணியாளர் தேர்வாணையத் தேர்வு முறைகேடுகளைக் கண்டித்தும், சிபிஐ விசாரணைக்கு உத்திரவிடக் கோரியும் திமுக இளைஞர் அணி, மாணவர் அணி சார்பில், பிராட்வேவில் உள்ள தேர்வாணைய அலுவலகம் முன்பு கண்டன ஆர்பாட்டம் நடைபெற்றது. இதில் திமுக இளைஞர் அணிச் செயலாளர் உதயநிதி ஸ்டாலின், மாணவர் அணிச் செயலாளர் எழிலரசன், சட்டமன்ற உறுப்பினர்கள் சேகர் பாபு, மா. சுப்பிரமணியன், புரசை ரங்கநாதன் உள்ளிட்ட பலர் பங்கேற்றனர். அப்போது, அதிமுக அரசிற்கு எதிராகவும், அமைச்சர் ஜெயக்குமாரைக் கண்டித்தும் முழக்கங்கள் எழுப்பப்பட்டன.
இதில் கண்டன உரையாற்றிய திமுக இளைஞர் அணிச் செயலாளர் உதயநிதி ஸ்டாலின், ”இளைஞர்கள் எத்தனையோ கனவுகளோடு அரசு வேலை கிடைக்க வேண்டும் என்று முயற்சிகள் மேற்கொள்ளும் நிலையில், அதை அப்படியே தலைகீழாக மாற்றியுள்ளது தேர்வாணையம். ஒரு காலத்தில் குறிப்பிட்ட சமூகம் மட்டும் அரசு வேலையில் இருந்த நிலையை மாற்றி, ஒடுக்கப்பட்ட மக்களுக்கும் பொருளாதாரத்தில் பின்தங்கியவர்களுக்காகவும் உருவாக்கப்பட்டது தான் இந்த அரசுப் பணியாளர் தேர்வாணையம்.
அரசை நிர்வகிக்கும் பல நிர்வாகிகள் மக்களோடு மக்களாக பணியாற்ற இந்த தேர்வாணையம் மூலம் தான் தேர்வாகின்றனர். அப்படித் தரமான ஆட்கள் தேர்வானால்தான் தரமான ஆட்சியும் நடக்கும். ஆனால், தற்போது தமிழகத்தில் நடைபெற்று வருவது தரங்கெட்ட ஆட்சி என்பதற்கு இந்த தேர்வு முறைகேடே சிறந்த எடுத்துக்காட்டு.
தேர்வு முறைகேடுகள் விசாரணை சிபிசிஐடிக்கு மாற்றப்பட்டுள்ளதாக அமைச்சர் ஜெயக்குமார் தெரிவித்துள்ளார். முன்னாள் முதல்வர் ஜெயலலிதா மரணத்தை விசாரிக்க இவர்கள் அமைத்த நீதிபதி ஆறுமுகசாமி விசாரணை ஆணையத்தின் முடிவே இன்னும் வெளிவரவில்லை. எனவே, அரசுப் பணியாளர் தேர்வாணைய முறைகேடுகளை சிபிஐ விசாரிக்க உத்தரவிட வேண்டும்.
குடியுரிமை திருத்தச் சட்டத்தை எதிர்த்து பல்வேறு மாநிலங்கள் தைரியமாக தீர்மானம் நிறைவேற்றி வரும் நிலையில், அதிமுக ஆட்சி மத்திய அரசுக்கு அடிமை அரசாக செயல்பட்டு வருகிறது. இவர்களுக்கு பாடம் புகட்ட நமக்கு 12 மாதங்கள் தான் உள்ளது. உள்ளாட்சித் தேர்தல் வெற்றி வெறும் ’இன்டர்வெல்’ தான், சட்டமன்றத் தேர்தல் வெற்றி தான் ’கிளைமேக்ஸ்’ ” எனத் தெரிவித்தார்.
இதையும் படிங்க: குரூப் 4, குரூப் 2ஏ இரண்டிலும் கல்லாகட்டிய சித்தாண்டி கைது!
