சென்னை: தமிழ்நாடு முதலமைச்சர் முக ஸ்டாலின், சென்னை பசுமை வழிச்சாலையிலுள்ள, குடிமைப் பணிகளுக்கு பயிற்சி வழங்கும் மையமான அண்ணா நிர்வாகப் பணியாளர் கல்லூரியில், "முதலமைச்சரின் புத்தாய்வுத் திட்டத்தை" தொடங்கி வைத்து, இளம் வல்லுநர்களுக்கு மடிக்கணினிகளை வழங்கினார்.
இந்நிகழ்வில் பேசிய தலைமைச் செயலாளர் இறையன்பு, "தமிழ்நாடு அரசு சார்பில் செயல்படுத்தப்படும் திட்டங்கள் நன்றாக செயல்படுகின்றனவா, அவற்றில் மாற்றம் தேவையா, திட்டங்களை எவ்வாறு மேம்படுத்தலாம் என்பதை சிந்தித்து ஆய்வு செய்து மேற்பார்வை செய்ய, புதிய பார்வை கொண்ட இளைஞர்கள் மூலம் புதிய முயற்சியை தமிழ்நாடு அரசு தொடங்கியுள்ளது.
இந்த திட்டத்திற்கான ஆலோசனை வழங்கி, 12 துறைகளின் மூலமாக இளைஞர்களுக்கான புத்தாய்வுத் திட்டத்தை கண்காணிக்க முதலமைச்சர் ஆலோசனை வழங்கினார்.
இதற்காக, தமிழகத்தில் 24 ஆயிரம் பேர் விண்ணப்பித்து, முதற்கட்ட தேர்வில் 14 ஆயிரம் பேர் வடிகட்டப்பட்டனர். அப்படி படிப்படியாக வடிகட்டப்பட்டு கடைசியாக 30 பேர் தேர்வு செய்யப்பட்டுள்ளனர். இவ்வாறு தேர்வு செய்யப்பட்ட நீங்கள் வடிகட்டிய புத்திசாலிகள்" என தெரிவித்தார்.
"வெளியில் இருந்து ஒரு திட்டத்தை பார்ப்பதை விட உள்ளே நின்று பார்ப்பது வேறு. அவ்வாறு, ஒவ்வொரு திட்டங்கள் குறித்தும் 30 நாட்கள் விரிவாக பயிற்சி அளிக்கப்படவுள்ளது. மேலும், சனிக்கிழமைகளில் கள ஆய்வுக்கு அழைத்துச் செல்லப்படுவார்கள். இந்தத் திட்டங்கள் குறித்து கலந்துரையாடலும் நடைபெறும்.
ஒரு திட்டத்தினால் என்ன பலன், எவ்வாறு செய்யப்படுகிறது என்பதை தரவுகளால் கொண்டு வந்து வழங்குகிற பணியை இவர்கள் செய்ய இருக்கிறார்கள். மேலும், ஆய்வு பணியை நீங்கள் மேற்கொள்ள விரும்பினால் பாரதிதாசன் பல்கலைக்கழகத்தில் இதற்கான வாய்ப்புகள் அளிக்கப்பட இருக்கிறது. ஒரு திட்டம் குறித்த பரிசோதனை முயற்சியாக இளைஞர்களிடமிருந்து மேற்கொள்ளப்படுகிறது" என தெரிவித்தார்.
இந்த நிகழ்ச்சியில், அமைச்சர்கள் துரைமுருகன், பொன்முடி, பிடிஆர் பழனிவேல் தியாகராஜன் ஆகியோர் பங்கேற்றனர்.
இதையும் படிங்க: பிஎப்ஐ அமைப்பின் அதிகாரப்பூர்வ ட்விட்டர் கணக்கு முடக்கம்
