கேரளாவைச் சேர்ந்த ஐஐடி மாணவி ஃபாத்திமா லத்தீப் கடந்த மாதம் சென்னை ஐஐடி வளாகத்திலேயே தற்கொலை செய்துகொண்டார். நாடு முழுவதும் பெரும் அதிர்வை ஏற்படுத்திய இந்தத் தற்கொலை வழக்கை மத்தியக் குற்றப்பிரிவு காவல்துறையினர் விசாரித்துவருகின்றனர்.
இந்த விசாரணையில், ஃபாத்திமா லத்தீப் அவருடைய அலைபேசியில் பதிவிட்டிருந்த தற்கொலைக் குறிப்புகள் உண்மையானவைதான் என தடயவியல் நிபுணர்கள் அறிக்கையளித்துள்ளனர். இதைத்தொடர்ந்து, ஃபாத்திமா லத்தீப்பின் தந்தை அப்துல் லத்தீப், டெல்லி சென்று பிரதமர் மோடி, உள் துறை அமைச்சர் அமித் ஷாவை நேரில் சந்தித்தும் மகள் மரணம் தொடர்பாக மனு அளித்தார்.
இந்நிலையில், சென்னை காவல் ஆணையர் அலுவலகத்தில் கூடுதல் ஆணையர் ஈஸ்வரமூர்த்தியை சந்தித்தபின் இன்று செய்தியாளர்களைச் சந்தித்த அப்துல் லத்தீப், “என் மகளின் மரணத்தில் பல்வேறு சந்தேகங்கள் விசாரணைக்குப் பிறகு எழுந்துள்ளது. அவர் மரணம் அடைந்தவுடன் அங்கு வந்த கோட்டூர்புரம் காவல் துறையினர் நடத்திய விசாரணையில் பல்வேறு குறைகள் உள்ளன. இந்த விவகாரத்தில் சுதர்சன் பத்மநாபன் உள்ளிட்ட மூன்று பேராசிரியர்கள், ஏழு மாணவர்களுக்கு தொடர்பு இருக்கிறது. ஆனால், அவர்களிடம் கோட்டூர்புரம் காவலர்கள் முறையாக விசாரணை நடத்தவில்லை.
ஃபாத்திமா இறந்த நாளன்று, அங்கு பிறந்தநாள் விழா நடந்திருக்கிறது. அதுதொடர்பாக விசாரிக்கப்பட்டதா எனத் தெரியவில்லை. எனது மகள் தூக்கிட்டு தற்கொலை செய்துகொண்டிருந்தால் நாக்கும் கண்ணும் வெளியே வந்திருக்கும், ஆனால் அதுபோன்று எதுவும் இல்லை.
எந்த ஒரு நிகழ்வையும் எழுதி வைத்து பெயரைக் குறிப்பிட்டுவைக்கும் பழக்கம் கொண்ட என் மகள், தனது இறப்பிற்கு காரணமானவர்கள் பற்றி எழுதிய கடிதம் கண்டிப்பாக இருக்கும், ஆனால் அதை காவல் துறையினர் கண்டுபிடிக்கவில்லை. சிசிடிவி காட்சிகளையும் முறையாக ஆய்வு செய்யவில்லை, உடற்கூறாய்வையும் பதிவு செய்யவில்லை.
எனவே, எனது மகள் கொலை செய்யப்பட்டிருக்கலாமோ என்ற ஐயம் எனக்கு எழுந்துள்ளது. இந்த அனைத்து சந்தேகங்களையும் பிரதமர், உள் துறை அமைச்சரிடம் தெரிவித்துள்ளேன்.
இவ்வழக்கு மிகவும் சிக்கலாக உள்ளது. உறுதியான ஆதாரங்களோடு தொடர்புடைய நபர்களை பிடிக்க விசாரணை நடத்திவருவதாக, வழக்கை விசாரிக்கும் கூடுதல் ஆணையர் ஈஸ்வரமூர்த்தி தெரிவித்துள்ளார் “ எனக் கூறினார்.
இதையும் படிங்க: ஐஐடியில் தாழ்த்தப்பட்ட மாணவர்களுக்கு அநீதி - டாக்டர்.ஸ்வராஜ் வித்வான் குற்றச்சாட்டு
