மீன்பிடி தடை காலத்தில் மீனவர்களுக்கு வழங்கப்படும் நிவாரண தொகையை அதிகரித்து வழங்க உத்தரவிடக்கோரி தொடரப்பட்ட வழக்கு, நீதிபதிகள் வினீத் கோத்தாரி மற்றும் சுரேஷ் குமார் அடங்கிய அமர்வு முன் மீண்டும் விசாரணைக்கு வந்தது.
அப்போது, சென்னை மெரினா கடற்கரையிலுள்ள கலங்கரை விளக்கம் முதல் பட்டினப்பாக்கம் வரை நடைபாதை அமைப்பது தொடர்பாக, கடலோர ஒழுங்குமுறை மண்டல ஆணையத்திற்கு விண்ணப்பித்துள்ளதாக மாநகராட்சி தரப்பில் தெரிவிக்கப்பட்டது.
இதை பதிவு செய்த நீதிபதிகள், லூப் சாலையில் புதிதாக கட்டவுள்ள மீன் அங்காடியின் கட்டுமானப் பணிகள் குறித்த அறிக்கையை தாக்கல் செய்ய மாநகராட்சிக்கு உத்தரவிட்டனர். மேலும், லூப் சாலையில் மாலை 3 மணிக்கு மேல் மீன் விற்பனை நடப்பதால் வாகனப் போக்குவரத்துக்கு இடையூறு ஏற்பட்டுள்ளதாக சுட்டிக் காட்டிய நீதிபதிகள், அப்பகுதியில் 24 மணி நேரமும் போக்குவரத்துக்கு இடையூறு இல்லாமல் இருப்பதை கண்காணிக்கும்படி, சென்னை மாநகராட்சிக்கும், மாநகர காவல் துறைக்கும் உத்தரவிட்டனர்.
மேலும், சென்னை மாநகராட்சி ஆணையர், மாநகர காவல் ஆணையர், போக்குவரத்து காவல் இணை ஆணையர் ஆகியோரை பிப்ரவரி 21ஆம் தேதி நேரில் ஆஜராகும்படியும் நீதிபதிகள் உத்தரவிட்டனர்.
இதையும் படிங்க: அதிமுகவின் இரட்டை தலைமைக்கு எதிரான வழக்கு - ஆகஸ்ட் 20ஆம் தேதிக்கு ஒத்திவைப்பு!
