இந்திய தேர்தல் ஆணையத்தின் உத்தரவின்படி வாக்காளர் பட்டியலில் திருத்தங்களை வாக்காளர்களே மேற்கொள்ளும் சிறப்புத் திட்டம் குறித்து அனைத்து அங்கீகரிக்கப்பட்ட அரசியல் கட்சி பிரதிநிதிகளுடன் ஆலோசனைக் கூட்டம் இன்று சென்னை மாநகராட்சி ரிப்பன் மாளிகையில், சென்னை மாநகராட்சி ஆணையரும் மாவட்ட தேர்தல் அலுவலருமான பிரகாஷ் தலைமையில் நடைபெற்றது.
இந்திய தேர்தல் ஆணையத்தின் உத்தரவுப்படி சென்னை மாவட்டத்திலுள்ள 16 சட்டப்பேரவை தொகுதிகளில் வாக்காளர்கள் பட்டியலில் உள்ள தங்களது விவரங்களின் திருத்தங்களை அவர்களே சிறப்புச் செயலி மூலம் மேற்கொள்ளும் திட்டம் கடந்த செப்டம்பர் 1ஆம் தேதி தொடங்கியது. அது வரும் 30ஆம் தேதிவரை நடைபெறுகிறது.
இதன்மூலம் வாக்காளர்கள் பட்டியலில் உள்ள அவர்களது பெயர், பிறந்த தேதி, முகவரி, புகைப்படம், பாலினம் உள்ளிட்ட விவரங்களில் திருத்தங்களை அவர்களே மேற்கொள்ளும் வசதி அறிமுகப்படுத்தப்பட்டுள்ளது.
இதற்காக என்.வி.எஸ்.பி. (NVSP) இணையதளம், வாக்காளர் உதவி கைப்பேசி செயலி (Voter Helpline Mobile App), 1950 அழைப்பு மையம் (மூத்த குடிமக்கள் மற்றும் மாற்றுத்திறனாளிகளுக்கு மட்டும்) வாக்காளர் உதவி மையத்தில் (voter felicitation centre) உள்ள வாக்காளர் பதிவு அலுவலகம் (electorial register office), இ-சேவை மையம் ஆகியவற்றின் மூலம் வாக்காளர்கள் தனது வாக்காளர் புகைப்பட அடையாள எண்ணை உள்ளீடு செய்து தேர்தல் ஆணையத்தால் அங்கீகரிக்கப்பட்ட ஆவணங்களில் ஒன்றை பதிவேற்றம் செய்யலாம்.
அவ்வாறு பதிவு செய்யப்பட்ட விவரங்கள் வாக்குச்சாவடி நிலை அலுவலர் மூலம் ஆய்வு செய்து திருத்தங்கள் மேற்கொள்ளப்பட்டு வரும் 15ஆம் தேதியன்று வெளியிடவிருக்கும் ஒருங்கிணைந்த வரைவு வாக்காளர் பட்டியலில் வெளியிடப்படும்.
இதன்மூலம் வாக்காளர்கள் தங்களின் விவரங்களை தாங்களே திருத்தம் செய்துகொள்ள இந்த வாய்ப்பினை பயன்படுத்திக் கொள்ளுமாறு மாவட்ட தேர்தல் அலுவலர் பிரகாஷ் வேண்டுகோள் விடுத்துள்ளார். இந்தக் கூட்டத்தில் மாவட்ட கூடுதல் தேர்தல் அலுவலர் லலிதா, மாவட்ட வருவாய் அலுவலர் பெருமாள் உள்ளிட்ட பலர் கலந்துகொண்டனர்.
