சென்னை: அரசு மேல்நிலைப்பள்ளிகளில் 11 மற்றும் 12ஆம் வகுப்புகளில் கணினி அறிவியல் பாடத்தை விருப்பப்பாடமாக படிக்கும் மாணவர்களிடம் வசூல் செய்யப்பட்ட தனிக்கட்டணம் 200 ரூபாய் ரத்து செய்யப்படுகிறது என பள்ளிக்கல்வித்துறை அமைச்சர் அன்பில் மகேஷ் பொய்யாமொழி அறிவித்துள்ளார்.
இதுகுறித்து, '2022-23ஆம் ஆண்டிற்கான பள்ளிக்கல்வித்துறை மானியக்கோரிக்கையின்போது, அரசு மேல்நிலைப் பள்ளிகளில் கணினி அறிவியல் பாடத்தை விருப்பப்பாடமாக பயிலும் மாணவர்களிடம் 2022-23ஆம் கல்வி ஆண்டில் இருந்து ரூ.200 தனிக்கட்டணமாக வசூலிக்கப்படுவது முழுமையாக ரத்து செய்யப்படும்.
இதனால் ஆண்டுதோறும் 3 லட்சம் மாணவர்கள் பயன் அடைவார்கள். இதற்காக ஆகும் செலவினம் 6 கோடியை அரசு ஏற்கும்’ என அறிவித்துள்ளார்.
இதனை செயல்படுத்தும் விதமாக பள்ளி கல்வித்துறைச் செயலாளர் காகர்லா உஷா வெளியிட்டுள்ள அரசாணையில்,
’அரசுப் பள்ளிகளில் மேல்நிலை வகுப்பில் கணினி அறிவியலை விருப்பப் பாடமாக படிக்கும் மாணவர்கள் செலுத்தும் தனிக்கட்டணம் ரூ.200 நடப்பு 2022-23ஆம் கல்வி ஆண்டில் இருந்து ரத்து செய்யப்படுகிறது. இதனால் லட்சத்து 50ஆயிரம் மாணவர்கள் பயன் அடைவார்கள். இதற்கான கட்டணத்தை அரசு செலுத்தும்’ எனத் தெரிவித்துள்ளார்.
இதையும் படிங்க: தமிழ்நாடு வேளாண் பல்கலைக்கழகத்தில் இளமறிவியல் படிப்பிற்கு விண்ணப்பிக்கலாம்!
