சென்னை: ராஜா அண்ணாமலைபுரம் போட்கிளப் பகுதியைச் சேர்ந்தவர் நாகராஜ் (31). பாஜக பிரமுகரான இவர், 2016ஆம் ஆண்டு நடந்த சட்டப்பேரவை தேர்தலில் ராணிப்பேட்டை தொகுதியில் போட்டியிட்டு தோல்வியடைந்தார். இவர், வங்கியில் லோன் வாங்கித்தருவதாக கூறி 92 லட்சம் ரூபாய் மோசடி செய்த வழக்கில், ஜூலை மாதம் சாஸ்திரிநகர் காவல் துறையினரால் கைது செய்யப்பட்டு, சிறையில் அடைத்தனர்.
கடந்த சில நாள்களுக்கு முன்பு நிபந்தனை ஜாமீனில் வெளியே வந்த நிலையில், தினமும் சாஸ்திரி நகர் காவல் நிலையத்தில் கையெழுத்திட்டு வருகிறார். இந்நிலையில், இன்று (செப்.01) காலை வழக்கம்போல் கையெழுத்துப் போடுவதற்காக காவல் நிலையத்திற்கு நாகராஜ் தன்னுடைய காரில் வந்தார்.
செல்போன் எண்ணை டிராக் செய்த போலீஸ்
பின்னர், காவல் நிலையத்தை விட்டு வெளியேறின நாகராஜை இரண்டு காரில் வந்த அடையாளம் தெரியாத எட்டு பேர் கொண்ட கும்பல் கடத்திச் சென்றது. காவல் நிலையம் எதிரே நடந்த இந்த கடத்தல் சம்பவம் குறித்து சாஸ்திரி நகர் காவல் துறையினர் விசாரணை நடத்தினர்.
பின்னர், நாகராஜின் செல்போன் எண்ணை டிராக் செய்தனர். அப்போது, போரூர் பகுதியில் உடற்பயிற்சி கூடத்தில் இருப்பதாக தெரியவந்தது. உடனடியாக தனிப்படை காவல் துறையினர் சம்பவ இடத்திற்கு விரைந்து சென்றனர். உடற்பயிற்சி கூடத்தில் வைத்து நாகராஜை கட்டிப்போட்டு அடித்ததாக தெரிகிறது.
கடத்தல் கும்பல் கைது
உடனே தனிப்படை காவல் துறையினர் கடத்தப்பட்ட நாகராஜை மீட்டு கடத்தலில் ஈடுபட்ட மனோகரன், விஜய், சிவகுமார், அலெக்ஸ், அய்யப்பன், கன்னியப்பன், மணிகண்டன், சத்ய சாய் பாபா ஆகிய எட்டு பேரை கைது செய்தனர்.
அவர்களிடம் நடத்திய விசாரணையில் போரூரைச் சேர்ந்த மனோகரன் தனது கூட்டாளிகளுடன் சேர்ந்து நாகராஜனை கடத்தியது தெரியவந்தது. மேலும் நாகராஜன், மனோகரிடம் லோன் வாங்கி தருவதாக கூறி 10 லட்சம் ரூபாய் பெற்றுக்ல்கொண்டு வங்கியில் 10 கோடி ரூபாய் வாங்கித்தருவதாக ஏமாற்றியது தெரியவந்தது.
போலீஸ் விசாரணை
இதையடுத்து, அவர்கள் எட்டு பேர் மீது, கலகம் செய்தல், பயங்கர ஆயுதங்களுடன் கலகம் செய்தல், ஆபாசமாக திட்டுதல், காயம் ஏற்படுத்துதல், சிறைவைத்தல், ஆட்கடத்தல், கொலை மிரட்டல் உள்ளிட்ட பிரிவுகளின் கீழ் சாஸ்திரி நகர் காவல் துறையினர் வழக்குப்பதிவு செய்துள்ளனர்.
கடத்தப்பட்ட நாகராஜ் 2017ஆம் ஆண்டு சென்னை மத்திய குற்றப்பிரிவு காவல் துறையினரால் மோசடி வழக்கில் கைது செய்யப்பட்டவர் என்பதும், முன்னாள் ஆளுநர் ரோசைய்யாவின் பேரன் என கூறி பண மோசடி வழக்கில் கைதாகி சிறைக்கு சென்று வந்தவர் என்பதும் குறிப்பிடத்தக்கது.
இதையும் படிங்க: ஆள் கடத்தல் விவகாரம் - மேலும் நான்கு பேர் கைது
