ஒரே இணைப்பில் இம்மூன்றும் - மத்திய அரசுடன் கைக்கோத்த திமுக அரசு

மத்திய அரசின் கரோனா தடுப்பூசி, ஜல்சக்தி உள்ளிட்ட பல்வேறு சீரிய திட்டங்களை தமிழ்நாடு அரசு திறம்படச் செயல்படுத்திவரும் நிலையில், தற்போது அந்த வரிசையில் இணைந்துள்ளது பாரத்நெட் திட்டம்.

சென்னை: ஒரே இணைப்பில் தொலைக்காட்சி, தொலைபேசி, இணையதள சேவைகள் என மூன்று டிஜிட்டல் சேவைகளை வழங்க மத்திய அரசின் ரூ.1815.31 கோடி நிதி உதவியுடன் பாரத்நெட் திட்டம் செயல்படுத்தப்படும் எனத் தமிழ்நாடு அரசு தகவல் தெரிவித்துள்ளது.

மத்திய அரசின் பாரத்நெட் திட்டமானது, அனைத்து ஊராட்சிகளையும் கண்ணாடி இழை கம்பிவடம் (Optical Fibre Cable) கொண்டு இணைத்து அதிவேக அலைக்கற்றை வழங்கும் திட்டமாகும். இத்திட்டத்தினை ரூ.1815.31 கோடி மதிப்பீட்டில் செயல்படுத்த மத்திய அரசு நிதி ஒதுக்கீடு செய்து ஒப்புதல் வழங்கியுள்ளது.

இத்திட்டத்தின்கீழ், பணி ஆணை வழங்கிய ஓராண்டு காலத்திற்குள் நான்கு தொகுப்புகளாகப் பிரிக்கப்பட்டு 388 வட்டாரங்களில் 12 ஆயிரத்து 525 கிராம பஞ்சாயத்துகளுக்கு 43 ஆயிரத்து நான்கு கி.மீ. தூரத்திற்கு உயர்மட்ட கம்பத்தின் வழியாகவும், ஆறாயிரத்து 496 கி.மீ. தூரத்திற்கு நிலத்தடி வழியாகவும் கண்ணாடி இழை கம்பிவட இணைப்பு செயல்படுத்தப்படும்.

மேலும், பாரத்நெட் திட்டத்துடன் கூடுதலாக தமிழ்நெட் என்னும் திட்டத்தின் மூலம் அனைத்துப் பேரூராட்சிகள், நகராட்சிகள், மாநகராட்சிகள், மாவட்டத் தலைமை இடங்களை கண்ணாடி இழை கம்பிவடம் மூலம் இணைக்கத் திட்டமிடப்பட்டுள்ளது.

பாரத்நெட் அமைப்பின் மூலம் ஒரே இணைப்பில் தொலைக்காட்சி, தொலைபேசி, இணையதள சேவைகள் என மூன்று டிஜிட்டல் சேவைகளை வழங்க முடியும்.

இதன் மூலம் அரசு அலுவலகங்கள், பொது நிறுவனங்கள், பள்ளிகள், கல்லூரிகள், தொழில் நிறுவனங்கள் அதிவேக அலைக்கற்றையைப் பயன்படுத்தி கிராமப்புறங்களில் வேலைவாய்ப்பு, சேவைகளை ஏற்படுத்துவதன் மூலம் சமூகப் பொருளாதார மேம்பாட்டிற்கு வழிவகுக்கும் எனத் தகவல் தொழில்நுட்பவியல் துறை கொள்கை விளக்கக் குறிப்பில் தமிழ்நாடு அரசு தெரிவித்துள்ளது.

இதையும் படிங்க: தேர்தலுக்குத் தயாராகும் பாஜக: 5 மாநில பொறுப்பாளர்கள் நியமனம்