சென்னை வேப்பேரியைச் சேர்ந்த அருண்பிரசாத் (29) புதுப்பேட்டை ஆயுதப்படை பிரிவில் காவலராகப் பணிபுரிந்துவந்தார். அவருக்கும் அன்னை சத்யா நகரைச் சேர்ந்த கஞ்சா கடத்தல் கும்பலுக்கும் பழக்கம் ஏற்பட்டது.
இத்தொடர்பால் கஞ்சா பழக்கத்துக்கு காவலரும் அடிமையாகியிருந்தார். இதற்கிடையில் அன்னை சத்யா நகரில் கஞ்சா விற்பனை நடப்பது காவல்துறையினருக்கு ரகசிய தகவல் கிடைத்தது. அக்.20ஆம் தேதி அப்பகுதியில் சோதனை நடத்தியபோது 17 வயது சிறுவன், ஆட்டோ ஓட்டுனர் ரமேஷ்குமார் (38) ஆகியோர் கைது செய்யப்பட்டனர்.
அவர்களிடம் நடத்திய விசாரணையில், இவர்களுக்கும் ஆயுதப்படை காவலர் அருண் பிரசாத்துக்கும் தொடர்பு இருப்பது தெரியவந்தது. இதைத்தொடர்ந்து காவலரும் நேற்று (அக்.22) கைது செய்யப்பட்டார். ஆயுதப்படை உயர் அலுவலர்கள் நடத்திய விசாரணைக்குப் பின் காவலர் அருண் பிரசாத்தை பணியிடை நீக்கம் செய்து உத்தரவிட்டனர்.
இதையும் படிங்க: கஞ்சா கடத்தல் வழக்கில் மூன்று பேருக்கு 10 ஆண்டுகள் கடுங்காவல்!
