மிஸ்டர் லோக்கல் படத்திற்காக தனக்கு பேசப்பட்ட சம்பளத்தில் நிலுவையில் உள்ள சுமார் 4 கோடி ரூபாயை வழங்க தயாரிப்பாளர் ஞானவேல் ராஜாவிற்கு உத்தரவிடக்கோரி, நடிகர் சிவகார்த்திகேயன் சென்னை உயர் நீதிமன்றத்தில் மனுத்தாக்கல் செய்துள்ளார்.
அதில், "தனக்கு வழங்க வேண்டிய தொகையை தரும் வரை ஞானவேல் ராஜாவின் புதிய படங்களை வெளியிட தடை விதிக்க வேண்டும்" எனக் கோரினார். இந்த வழக்கில் தயாரிப்பாளர் ஞானவேல் ராஜா தரப்பில் பதில்மனு தாக்கல் செய்யப்பட்டுள்ளது.
அதில், "நடிகர் சிவ கார்த்திகேயன் நடித்த, மிஸ்டர் லோக்கல் படத்தின் கதை தனக்கு பிடிக்கவில்லை எனவும், அந்தப் படத்தின் இயக்குநராக ராஜேஷ்தான் வேண்டுமென சிவகார்த்திகேயன் கட்டாயப்படுத்தியதால்தான் அந்த படம் தயாரிக்கப்பட்டதாகவும், அந்தப் படத்தால் தமக்கு 20 கோடி ரூபாய் நஷ்டம் ஏற்பட்டதாகவும் தெரிவித்துள்ளார்.
மேலும், மிஸ்டர் லோக்கல் படத்தில் ஏற்பட்ட நஷ்டத்திற்காக விநியோகஸ்தர்கள் தரப்பில் நெருக்கடி கொடுத்த நிலையில், 2 கோடியே 40 லட்சம் ரூபாய் தர வேண்டாம் எனவும், விநியோகஸ்தர்கள் பிரச்சினையில் தன்னை சிக்க வைத்து விட வேண்டாம் எனவும் சிவகார்த்திகேயன் கூறினார்.
ஆனால் தற்போது, மூன்று ஆண்டுகளுக்கு பின்னர், உண்மை தகவல்களை மறைத்து மனு தாக்கல் செய்துள்ளார். எனவே, சிவகார்த்திகேயன் தாக்கல் செய்துள்ள மனுவை அபராதத்துடன் தள்ளுபடி செய்ய வேண்டும்" எனத் தயாரிப்பாளர் ஞானவேல் ராஜா தெரிவித்தார்.
இந்த வழக்கு மீண்டும் இன்று நீதிபதி எம்.சுந்தர் முன்பு விசாரணைக்கு வந்தது. வழக்கை விசாரித்த நீதிபதி, சம்பள விவகாரம் தொடர்பாக மூன்று ஆண்டுகள் கழித்து மனுத்தாக்கல் செய்தது ஏன்? என கேள்வி எழுப்பினார்.
டி.டி.எஸ். விவகாரம் தொடர்பாக ஏற்கனவே ஒரு மனு நிலுவையில் இருக்கும்போது, மற்றொரு மனு தாக்கல் செய்யப்பட்டது ஏன்? என்றும் நடிகர் சிவ கார்த்திகேயன் தரப்பிற்கு கேள்வி எழுப்பினார். பின்னர், வழக்கின் விசாரணையை ஏப்ரல் 13ஆம் தேதிக்கு ஒத்தி வைத்தார்.
இதையும் படிங்க : 'டான்' திரைப்படத்தையும் கைப்பற்றிய ரெட் ஜெயன்ட்ஸ்
