சென்னை: குழந்தைகள் உரிமைகள் மற்றும் முன்னேற்ற மையம் நடத்திய கள ஆய்வில், ஆதிதிராவிடர் பள்ளிகள் மற்றும் குழந்தைகள் குறித்த அதிர்ச்சிகரமான தகவல்கள் வெளியாகியுள்ளன.
ஆதிதிராவிடர் பள்ளிகள் எண்ணிக்கை
2016 -17, 2019 - 20 பள்ளி சேர்க்கை விவரங்களைப் பார்க்கும்போது, ஆதி திராவிடர் பள்ளிகளில் ஒரு பள்ளி மூடப்பட்டிருக்கிறது, ஒரு உயர்நிலைப்பள்ளி மேல்நிலைப்பள்ளியாகத் தரம் குறைக்கப்பட்டுள்ளது. உயர்நிலைப்பள்ளிகளில் மாணவர்களின் எண்ணிக்கையும் கணிசமான அளவில் குறைந்துள்ளது.
நடுநிலைப் பள்ளிகள், மேல்நிலைப் பள்ளிகளில் மாணவர்களின் எண்ணிக்கை அதிகரித்துள்ளது. ஆரம்பப் பள்ளிகளின் எண்ணிக்கை குறைந்துள்ளது.
ஆதி திராவிடர் நலப்பள்ளிகள் உள்ள பகுதிகளில் தனியார் பள்ளிகளின் வருகையாலும், ஆங்கில வழிக்கல்வி இல்லாததாலும் மாணவர்கள் சேர்க்கை குறைந்துள்ளது கள ஆய்வின்போது தெரியவந்துள்ளது. உயர்நிலைப் பள்ளிகளில் மாணவர்கள் படிப்பைத் தொடர முடியாமல் போவதும் நிகழ்ந்துள்ளது.
இந்த ஊரடங்கு காலமான 2020-21இல் இந்த நிலை மேலும் அதிகரித்துள்ளது. ஆய்வுக்குழுவினர் சந்தித்த பள்ளிகள் சிலவற்றில், தனியார் பள்ளிகளிலிருந்து ஆதி திராவிடர் நலப்பள்ளிக்கு மாணவர் சேர்க்கை அதிகரித்திருப்பது தெரியவந்துள்ளது.
கடந்த 2016 -17 கல்யாண்டில் 98 ஆயிரத்து 39 மாணவர்களுடன் ஆயிரத்து 314 விடுதிகள் இயங்கிவந்தன. அது, 2019 - 20 கல்வியாண்டில் ஆயிரத்து 324 விடுதிகள், 98 ஆயிரத்து 539 மாணவர்களாக அதிகரித்துள்ளது. இதில், 82 ஆயிரத்து766 மாணவர்களுடன் கூடிய ஆயிரத்து 143 பள்ளி விடுதிகள் அடங்கும்.
கடந்த 2016-17 கல்வியாண்டில் 82 ஆயிரத்து 130 மாணவர்களுடன் ஆயிரத்து 143 பள்ளி விடுதிகள் இயங்கிவந்தன. இந்த இரண்டு ஆண்டுகளில் 636 மாணவர்கள் அதிகரித்துள்ளனர். அரசின் புள்ளிவிவரப்படி, இவர்களில் 10 விழுக்காடு பிற்படுத்தப்பட்ட மற்றும் மிகவும் பிற்படுத்தப்பட்ட பிரிவினைச் சேர்ந்தவர்கள்.
கள ஆய்வின்போது, காரை கிராம ஆதி திராவிடர் நல மேல்நிலைப்பள்ளியில், அருகிலுள்ள குருவமலைப் பகுதியிலிருந்து 10 ஆதிவாசி மாணவர்களும் பள்ளி விடுதியில் சேர்க்கப்பட்டிருந்தது தெரியவந்தது.
ஆதி திராவிடர் நலனுக்கான நிதி ஒதுக்கீடு
நடப்பு 2021 - 22 நிதியாண்டின் இடைக்கால பட்ஜெட் அறிவிப்பின்படி, ஆதி திராவிடர் நலத்திற்கான சிறப்புத் திட்ட நிதியான ( SC Special Component Plan) 13 ஆயிரத்து 967 கோடியில், மூன்றாயிரத்து 457 கோடி, ஆதி திராவிட குழந்தைகளின் கல்விக்காக ஒதுக்கப்பட்டுள்ளது. 12ஆவது ஐந்தாண்டுத் திட்டத்தில் 16 விழுக்காடாக இருந்தது 25 விழுக்காடாக உயர்ந்துள்ளது வரவேற்க வேண்டியதாக இருந்தாலும், இந்த நிதியில், ஒன்பதாயிரத்து 858 கோடி ரூபாய், ஆதி திராவிட மக்களின் பொருளாதார மேம்பாட்டிற்காகப் பிற துறைகளுக்கு ஒதுக்கப்பட்டிருக்கிறது.
இடைக்கால பட்ஜெட்டில் பள்ளிக் கல்வித் துறைக்கு ஒதுக்கப்பட்டுள்ள 34 ஆயிரத்து 181 கோடி ரூபாயில், ஆதி திராவிட மக்களுக்கான தொகையான 20 விழுக்காட்டை ஈடு செய்யும்விதமாக ஆறாயிரத்து 836 கோடி ஒதுக்கப்பட்டுள்ளது.
தமிழ்நாட்டில் உள்ள ஆதி திராவிடர் பள்ளிகள் சரியான வசதிகள் இன்றி இருப்பதால், பள்ளிக் குழந்தைகளின் வாழ்க்கை, குழந்தைத் தொழிலாளர்கள், குழந்தை திருமணம் உள்ளிட்ட இன்னல்களை குழந்தைகள் சந்திக்கின்றனர்.
கண்டறிந்தவைகள்
கரோனா பெருந்தொற்று, ஊரடங்கு நிலையில் அனைத்துப் பள்ளிகளின் நிலையும் பின்னடைந்து இருந்தாலும், ஆதி திராவிட நலப்பள்ளிகளில் பயிலும் குழந்தைகளுக்கு கல்வியைத் தொடர்ந்து அளிப்பதற்கான வாய்ப்புகள் மறுக்கப்பட்டுள்ளதைக் காண்கிறோம்.
அரசு அறிவித்துள்ள கல்வித் தொலைக்காட்சி, குழந்தைகள் நேயமுள்ளதாக, அவர்களைச் சென்றடையும் வாய்ப்புள்ளதாக அமையவில்லை. ஆதி திராவிடர் வசிக்கும் கிராமங்களில் 70 விழுக்காட்டிற்கு மேற்பட்ட குழந்தைகளுக்குத் தொலைத்தொடர்பு வாய்ப்புகள் இல்லை. கடந்த இரண்டு ஆண்டுகளில், பழுதடைந்த தொலைக்காட்சி, குழந்தைகளுக்குப் பொருந்தாத தொலைக்காட்சி கல்வி நேரம், ஆசிரியர் பற்றாக்குறை, ஓராசிரியர் பள்ளி போன்ற நிலைகளால் மாணவர்களைக் கல்வி சென்றடையவில்லை.
விடுதிகளில் தங்கியிருந்த மாணவர்கள் அவரவர் வீடுகளுக்கு, கிராமங்களுக்குச் சென்றவுடன் என்ன நடந்தது என்ற தகவல் ஏதும் கல்வித் துறையிடமோ, பள்ளிகளிடமோ இல்லை. அவர்கள் பெரும்பாலும், குழந்தைத் தொழிலாளர்களாகவும் மாறியுள்ளனர். அது மட்டுமல்லாமல், ஆரம்பப் பள்ளியிலிருந்து நடுநிலைப் பள்ளிக்கும், நடுநிலைப் பள்ளியிலிருந்து உயர் நிலை மற்றும் மேல்நிலை பள்ளிகளுக்கும் சென்றுவிட்டார்களா என்ற நிலை குறித்த தகவல்கள் இல்லை.
கரோனா பெருந்தொற்று காலத்தில் பள்ளிகள் மூடப்பட்டுள்ளதால் குழந்தைகள் பள்ளியை, பாடங்களை, ஆசிரியரை, எண்ணறிவை, எழுத்தறிவை மறந்துவிட்டனர். அனைத்து மாணவர்களுக்கும் இணைய வழி வகுப்புகளின் வாய்ப்பு வழங்கப்பட்டவில்லை. நகரத்தை ஒட்டியுள்ள பள்ளிகளிலேயே 30 விழுக்காடு மாணவர்களின் குடும்பங்களே தொலைபேசி வாங்கும் வாய்ப்பு உள்ளவர்கள். தொலை தூர கிராமங்களில் இந்த வாய்ப்புள்ளவர்கள் 10 விழுக்காட்டினரே.
தொலைக் காட்சியில் பாடம் நடத்துவது மாணவர்களை கவனித்து உற்று நோக்கி, சந்தேகங்களைத் தீர்த்து நேரடியாக உரையாடி மாணவர்களுக்கு அவை உதவவில்லை. பாதுகாப்பு உபகரணங்கள் (முகக்கவசங்கள், சானிடைசர் தடுப்பு மருந்துகள்) பள்ளியில் கொடுத்து பள்ளிகளைத் திறப்பதே குழந்தைகள் கல்வியில் நாட்டம் கொள்வதற்கும் குழந்தைத் தொழிலாளர் முறையையும் குழந்தைத் திருமணங்களையும் தடுப்பதற்கு வழி வகுக்கும்.
சில பள்ளிகளில் 8ஆம் வகுப்பு முடித்தவர்கள் 9ஆம் வகுப்பில் சேரவும் இல்லை மாற்றுச் சான்றிதழ் வாங்கவும் இல்லை. சிலர் இடம் பெயர்ந்தும் போய்விட்டார்கள்.
தமிழ்நாட்டில் பல்வேறு மாவட்டங்களில் ஒவ்வொரு வருவாய் வட்டங்களிலும் வருவாய்த் துறை சமூகப் பாதுகாப்புத்திட்டம் என தனித்தனி வட்டாட்சியர்கள் அமர்த்தப்பட்டுள்ளார்கள். ஆதி திராவிடர் நலத் துறைக்கு மட்டும் இரண்டு மூன்று வருவாய் வட்டங்களை இணைத்து ஆதி திராவிடர் நலத்துறை வட்டாசியர் அலுவலகம் செயல்பட்டுவருகிறது.
இந்த வட்டாட்சியர் அலுவலகத்தில் உள்ள பணியிடங்கள் கூட (வருவாய் ஆய்வாளர், இளநிலை உதவியாளர், நிலஅளவையாளர்) நிரப்பப்படாமல் உள்ளன. ஓய்வு பெற்ற வருவாய்த் துறை அலுவலர்கள் பலரை தொகுப்பூதியம் அடிப்படையில் பணியில் அமர்த்தியுள்ளது அரசு. இதனால் பள்ளிகளை அடிக்கடி பார்வையிடுவது முடியாமல் போகிறது.
குறிப்பாக அரசு ஆரம்பப் பள்ளிகளில் பள்ளிக் காவலர்கள் இல்லாததால் பள்ளி வளாகம் தவறான செயல்பாடுகளுக்கு பயன்படுத்தப்படுகிறது. இதனால் குழந்தைகளுக்கும் ஆசிரியர்களுக்கும் பாதுகாப்பற்ற சூழல் உள்ளது. குழுவினர் பார்த்த பல பள்ளிகளிலும் மாணவர்கள் எண்ணிக்கை குறைவாகவே காணப்படுகின்றன.
இதற்கான காரணங்களாக அரசு ஆதி திராவிடர் நலப் பள்ளிகளின் அருகில் ஊராட்சி ஒன்றியப் பள்ளிகள் அமைந்திருப்பதும் அப்பள்ளிகளில் வகுப்பறை சுற்றுச்சுவர் உள்ளிட்ட உள்கட்டமைப்பு வசதிகள் செவ்வனே செய்து தரப்படிருப்பதுமே. அத்துடன் இந்த ஆதி திராவிட நலப் பள்ளிகளின் அருகிலே பல தனியார் பள்ளிகளுக்கு அனுமதி கொடுத்து அவை இயங்கி கொண்டிருப்பதும் அவற்றில் ஆங்கிலவழிக் கல்வி இருப்பதையும் முக்கிய காரணமாகக் கருதுகிறோம்.
எனவே அரசு ஆதி திராவிடர் நலப்பள்ளிகளில் மாணவர்களின் எண்ணிக்கை குறைவதற்கு ஆதிதிராவிடர் நலத் துறையும் அரசுமே பொறுப்பேற்க வேண்டும் எனச் சுட்டிக் காட்டப்பட்டுள்ளது.
பரிந்துரைகள்
ஆதிதிராவிடர் நலத்துறையின் 80 விழுக்காடு நிதி, கல்விக்காக செலவிடப்படுவதாகக் கூறப்பட்டாலும், கள நிலவரம் அதற்கு மாறாக உள்ளது. இந்திய அரசின் 100 விழுக்காடு நிதி பெறும் ஆதிதிராவிட நலப்பள்ளிகள், கேந்திரிய வித்யாலயா போன்று கல்வித் தரத்திலும், உள்கட்டமைப்பு வசதிகளிலும் சிறந்து விளங்கியிருக்க வேண்டும். அந்நிலை அடையாததற்கான காரணங்கள் கண்டறியப்பட்டு அவை உடனடியாகக் களையப்பட வேண்டும்.
இதனைக் கருத்தில் கொண்டு, ஒன்றிய அரசும், மாநில அரசும் இப்பள்ளிகளுக்காக செலவிடப்படும் நிதி விவரங்கள் குறித்து வெள்ளை அறிக்கை வெளியிட வேண்டும்.
ஒடுக்கப்பட்ட குழந்தைகள் சிறப்பான கல்வி பெறுவதற்கான நிர்வாக சீர்த்தித்திருத்தங்களை மேற்கொள்ள(ஒடுக்கப்பட்ட குழந்தைகள் கல்விக்கான தனி இயக்குனரகம் அமைப்பது உள்ளிட்ட) , கால வரையறைக்குட்பட்டு செயல்படும் உயர்மட்டக் குழுவை அமைக்க வேண்டும்.
ஊரடங்கு காலம் முடியும் வரை, ஆசிரியர்கள் மாணவர்களின் இருப்பிடங்களுக்கு சென்று மக்கள் பங்கேற்புடன் கூடிய குழுக் கல்வி முறையை உருவாக்க வேண்டும்.
சமூகத்தில் படித்த இளைஞர்களின் துணையுடன் அக்கம்பக்க அளவில் பள்ளிக் கல்விக் குழுக்களை உருவாக்க வேண்டும்.
ஆதிதிராவிடர் நலப்பள்ளிகளின் நில எல்லை ஆக்கிரமிப்பாளர்களிடமிருந்து மீட்கப்பட்டு பள்ளிகளிடம் ஒப்படைக்கப்பட வேண்டும். விளையாட்டு மைதானம், சுற்றுச்சுவர், உள்கட்டமைப்பு வசதிகள் சீரமைக்கப்பட வேண்டும்.
இந்த மூன்று பிரிவுகளையும் அடிப்படையாகக் கொண்டு ஆதிதிராவிட நலப்பள்ளிகள் அரசின் சிறப்பு கவனத்தைப் பெற்று தரம் உயர்த்தப்படுவது உறுதி செய்யப்பட வேண்டும் .
ஆதிதிராவிடர் நலப்பள்ளிகளில் பயிலும் குழந்தைகளை பங்கேற்கச் செய்ய பள்ளி மாணவர் குழுக்கள் உருவாக்கப்பட வேண்டும்.
இக்குழுவினை மாவட்ட ஆட்சித்தலைவர், ஊராட்சிமன்றப் பிரதிநிதிகள் மாதம் ஒரு முறை சந்தித்து அவர்களது தேவைகளை கேட்டு அவற்றை நிறைவேற்ற வேண்டும்.
குறிப்பான பரிந்துரைகள்
ஆங்கிலவழிக் கல்வியும், பள்ளி முன் பருவக் கல்வியும் ஆதிதிராவிட நலப்பள்ளிகளில் அறிமுகப்படுத்தப்பட வேண்டும். அதற்கான உள் கட்டமைப்பு வசதிகளும், ஆசிரியர் பணியிடங்களும் போதுமான அளவில் உறுதி செய்யப்பட வேண்டும்.
கரோனா, ஊரடங்கு காலத்தில் ஆதிதிராவிட நலப் பள்ளிகளில் / விடுதிகளில் தங்கிப் பயிலும் அனைத்து வகுப்பு மாணவர்களுக்கும் தொலைத் தொடர்புடன் கூடிய கணினி அலைபேசிகள் வழங்கப்பட வேண்டும். கிராமங்களில் அமைந்துள்ள கிராமப் குழந்தைகள் பாதுகாப்புக் குழு (VLCPC ) வலுப்படுத்தப்பட்டு , இந்த பள்ளிகளைத் தொடர் கண்காணிப்பு செய்ய வேண்டும்.
ஆதிதிராவிட நலப் பள்ளிகளில் பெண் குழந்தைகளின் கல்வி நிலையும், விடுதிகளில் அவர்கள் தங்கும் வசதிகளும் ஆய்வு செய்யப்பட்டு மாற்றம் செய்யப்பட வேண்டும்.
ஆதிதிராவிடர் நலத்திற்கான துணைத் திட்ட நிதி முழுதும் ஆதிதிராவிட நலத் துறைக்கே ஒதுக்கப்பட வேண்டும். பிறதுறைகளுக்கு இந்நிதி, ஒதுக்கப்படுவதால், ஆதிதிராவிடர் நலனுக்கான திட்டங்கள் முழுமையாக அம்மக்களுக்கு சென்றடைவதில்லை. ஆதிதிராவிட அமைச்சகம் வலுப்படுத்தப்பட்டு , பள்ளிக்கல்வி அமைச்சகம் போன்று முதல்வரின் தனிகவனம் பெற்ற அமைச்சகமாக ஆக்கப்பட வேண்டும்.
30 ஆண்டுகளுக்கு மேற்பட்ட கட்டிடங்கள் இடிக்கப்பட்டு புதுமைப் படுத்தப்பட வேண்டும் . தீண்டாமை / சமூக ஒடுக்குதல் நடைபெறும் கிராமங்களில் ஆதிதிராவிட நலப்பள்ளிகள் தொடங்கப் படவேண்டும்.
மூடப்பட்ட / மூடப்படும் நிலையிலுள்ள விடுதிகள் / பள்ளிகள் பயிற்சி மையங்களாக போதுமான நிதி ஆதாரத்தோடு ஆதிதிராவிட இளைஞர்கள் / கல்லூரிக் கல்வி பெறும் மாணவர்கள் பயன்படுத்தும் படி சிறப்புத் திட்டம் வகுக்கப்பட வேண்டும். தனியார் பொறியியல் மற்றும் மருத்துவம் பயிலும் மாணவர்களும் விடுதிகளில் தங்கிப் பயில வாய்ப்பு ஏற்படுத்த வேண்டும்.
பல பள்ளிகளில் சுற்றுச்சுவர் இல்லாமல் பள்ளி பூட்டிக் கிடக்கும் நேரங்களில் வெளிநபர்கள் பலர் பள்ளி வளாகத்திற்குள் நுழைந்து மது அருந்துதல் , மலம்கழித்தல், சீட்டு விளையாடுதல், போதைப் பொருள்களைப் பயன்படுத்துதல் போன்ற செயல்களைச் செய்து வருகின்றனர். இதைத் தவிர்ப்பதற்கு அனைத்துப் பள்ளிகளிலும் சுற்றுச்சுவர் எழுப்பப்பட வேண்டும். வாயில் காப்பாளர்கள் நியமிக்கப்பட்டு பள்ளிவளாகம் தவறான செயல்களுக்கு பயன்படுவது தடுக்கப்பட வேண்டும்.
பள்ளிகள் / விடுதிகள் ஊழலற்ற கல்வி அதிகாரிகளால் மாதாந்திரக் கண்காணிப்பிற்கு உட்படுத்தப்பட வேண்டும். இந்தக் கண்காணிப்பின் போது குழந்தைகளின் கருத்துக்களை கேட்பதும், பயமின்றி அவர்கள் புகார்களைத் தெரிவிக்கவும் ஏற்பாடுகள் செய்யப்பட வேண்டும்.
குறப்பாக வேலூர் மாவட்டம் மேல்காவனூர் , பள்ளியிலும் இராணிப் பேட்டை மாவட்டம் காரை நடுநிலைப் பள்ளியிலும் பழைய கட்டிடங்கள் இடிக்கப்படாமல் பழுதடைந்த நிலையில் உள்ளன. கரோனா காலம் முடிந்து பள்ளிகள் திறக்கப்படும் போது குழந்தைகள் இந்தக் கட்டிடங்களின் அருகில் செல்ல வாய்ப்புள்ளதால் ஆபத்தாக முடியக்கூடும். எனவே கைவிட்டப்படுள்ள கட்டிடங்கள் அனைத்தும் தரைமட்டமாக இடித்துத்தள்ள நிர்வாகம் உடனடி நடவடிக்கை எடுக்க வேண்டும். எனவே அனைத்துப் பள்ளிகளின் கட்டிடங்களின் நிலையும் திறமை வாய்ந்த பொறியாளர்களைக் கொண்டு ஆய்வு செய்யப்பட்டு உடனடியாக சீர் செய்யப்பட வேண்டும் .
கரோனா காலத்தில் பள்ளியில் இருந்து விடுபட்டு குழந்தைத் தொழிலாளராக மாறிய குழந்தைகள் மீண்டும் பள்ளியில் இணைவதை உறுதி செய்ய வேண்டும். குழந்தை நேய கற்றல் சூழலை உறுதி செய்ய பள்ளிகளில் நூலகங்கள், ஆய்வுக்கூடங்கள், விளையாட்டு மைதானங்கள் இருப்பது அவசியமானதாகும். பள்ளிகளில் குடிநீர் , தண்ணீர் வசதியுடன் இரு பாலருக்கான முறையான கழிவறைகளும் அதற்கான தூய்மைப் பணியாளர்களும் நியமித்து அதற்கான நிதியை அனைத்து பள்ளிகளுக்கும் ஒதுக்கிட வேண்டும். புதிய தொழில் நுட்பங்களைப் பயன்படுத்தி மகிழ்ச்சியாகப் பணியாற்ற கணிணி மூலம் கல்வித் திட்டம் போதுமான ஆசிரியர்கள் நியமனத்தோடு SMART CLASS அறிமுகப்படுத்தப்பட வேண்டும்.
ஆதிதிராவிட குழந்தைகளுக்கு அதிக நிதி
ஆதிதிராவிடர் குழந்தைகளுக்கு இப்பள்ளிதான் முக்கிய மையமாக இருக்கும் என உணர்ந்து இந்திய அரசியலமைப்புச் சட்டகூறுகள் 41 மற்றும் 46 இன் படி பட்டியல் சாதி மற்றும் பட்டியல் இன பழங்குடியினர் குழந்தைகளின் கல்விக்கும் பொருளாதார மேம்பாட்டுக்கும் ஒன்றிய அரசும் மாநில அரசும் மிகுந்த அக்கறையோடு செயல்பட வேண்டும் .
நிதி ஒதுக்கீடு , கண்காணித்தல், பணியிடங்களை நிரப்புதல், அறிவியல் ஆய்வகம், விளையாட்டுப் பொருட்கள், நூலகம் உள்ளிட்ட உட்கட்டமைப்புகளை சரிசெய்தல், உதவியாளர்களை நியமித்தல் போன்றவற்றை மிகுந்த அக்கறையோடு தொடர்ந்து செய்தால்தான் சமூகத்தால் புறக்கணிக்கப்பட்ட , வாய்ப்பு மறுக்கப்பட்ட , ஒடுக்கப்பட்ட சமூகக் குழந்தைகளின் கல்வி வளர்ச்சியை உயரச் செய்ய முடியும் .
இம்மக்களின் சமூக பொருளாதார நிலை உயர கல்வி ஒரு மிகப் பெரிய கருவி என்பதை மனதில் கொண்டு சமூகநீதியில் அக்கறை உள்ள இந்த அரசு ஆதி திராவிட நலப் பள்ளிகள் தொடர்ந்து இயங்கிட தேவையான நிதி ஒதுக்கீடு செய்ய வேண்டும்.
இதையும் படிங்க: சென்னையில் மாணவர்கள் மோதலை தடுக்க வாட்ஸ்அப் குழு அமைப்பு!
