சர்வதேச அளவில் முக்கிய ரேட்டிங் நிறுவனமான மூடிஸ் அடுத்த இரண்டு ஆண்டுகளில் வளர்ந்துவரும் ஆசியாவில் வங்கி மூலதனம் வீழ்ச்சியடையும் என்று தெரிவித்துள்ளது.
இது குறித்து மூடிஸ் வெளியிட்டுள்ள அறிக்கையில், "கரோனாவால் தற்போது ஏற்பட்டுள்ள நிலைமை சவாலாக இருப்பதால், வளர்ந்துவரும் நாடுகளில் இருக்கும் வங்கிகளின் மூலதனம் நிச்சயமற்ற போக்கில் உள்ளது. வளர்ந்துவரும் நாடுகளில் உள்ள வங்கிகளுக்கு 2021ஆம் ஆண்டு எதிர்மறையாகவே இருக்கும்.
ஆசிய பசிபிக் பிராந்தியத்தில் இருக்கும் வங்கிகளின் வாராக்கடன் அதிகரிக்கிறது. இதனால் அடுத்த இரண்டு ஆண்டுகளில் வளர்ந்துவரும் ஆசியாவில் வங்கி மூலதனம் வீழ்ச்சியடையும். குறிப்பாக, இந்தியா, இலங்கையில் உள்ள வங்கிகளில் அரசு, தனியார் முதலீடு இல்லாததால் பெரியளவில் மூலதனத்தில் சரிவு ஏற்படும்.
இந்தியா, தாய்லாந்து நாடுகளின் பொருளாதாரம் வரலாறு காணாத வகையில் மோசமாக பாதிக்கப்பட்டுள்ளது. இதனால் இந்த நாடுகளில் உள்ள வங்கிகளின் வாராக்கடன் அதிகமாக உயரும். குறிப்பாக இந்தியாவில், வங்கி சாரா நிதி நிறுவனங்களின் மீது சுமை அதிகரிக்கும். இது அவற்றின் கடன் அளிக்கும் திறனைக் குறைக்கும்.
குறைந்த வட்டி விகிதம், குறைவான கடன் காரணமாக லாப வளர்ச்சியும் குறையும். ஆனால், குறைந்தளவில் கடன் அளிப்பது மூலதனத்தை அதிகரிக்கும் வகையில் இருக்க வேண்டும்" என்றார்.
இதையும் படிங்க: கரோனா நெருக்கடிக்கு மத்தியில் மூன்று புதிய விமானங்களை வாங்கும் ஏர்ஏசியா!
