'ரௌத்திரம்' திரைப்படம் மூலம் இயக்குநராக அறிமுகமானவர், கோகுல். இதையடுத்து இவர் இயக்கிய 'இதற்குத்தானே ஆசைப்பட்டாய் பாலகுமாரா' திரைப்படம் நல்ல வரவேற்பைப் பெற்றது.
இந்நிலையில் இவர் 'கொரோனா குமார்' என்ற திரைப்படத்தை இயக்க உள்ளதாக அறிவிப்பு வெளியாகியுள்ளது.
உலகையே அச்சுறுத்தி வரும் கரோனா குறித்து யாருமே திரைப்படம் எடுக்கும் முடிவில் இல்லையோ, என்று நினைத்துக் கொண்டிருக்கும் சூழலில், முதல் ஆளாக 'கொரோனா குமார்' என்று பட தலைப்பை தேர்வு செய்திருக்கிறார், இயக்குநர் கோகுல். இப்படத்தின் போஸ்டரை விஜய் சேதுபதி, தனது ட்விட்டர் பக்கத்தில் வெளியிட்டுள்ளார்.
மேலும் குமார் என்பது, 'இதற்குத்தானே ஆசைப்பட்டாய் பாலகுமாரா' படத்தில் விஜய் சேதுபதியின் பெயர் ஆகும். அப்பெயர் மிகவும் டிரெண்ட் ஆனதால், அதை இப்படத்தின் தலைப்பாக வைத்துள்ளார் என்பது குறிப்பிடத்தக்கது.
விரைவில் 'கொரோனா குமார்' படத்தின் கூடுதல் தகவல் வெளியிடப்படும் என்று தெரிவிக்கப்பட்டுள்ளது.
