சென்னை ஈக்காட்டுதாங்கல் பகுதியைச் சேர்ந்த 74 வயது முதியவரான ஆதிகேசவனுக்கு கரோனா தொற்று இருந்ததால் ஈக்காட்டுதாங்கல் ஆரம்ப சுகாதார நிலையத்திலிருந்து கீழ்பாக்கம் மருத்துவமனைக்கு அழைத்து செல்லப்பட்டு அங்கு இடம் இல்லாததால், ராஜீவ்காந்தி அரசு பொது மருத்துவமனையில் அனுமதிக்கப்பட்டார். சிகிச்சையில் இருந்த ஆதிகேசவன், மருத்துவமனையிலிருந்து தப்பி மாயமாகி விட்டார்.
இதுகுறித்து அவரது மகன் மணிவண்ணன் அளித்த புகாரின் அடிப்படையில், கீழ்ப்பாக்கம் காவல் நிலையத்தில் ஆள்மாயம் என்ற பிரிவில் வழக்கு பதியப்பட்டது. இந்நிலையில் அவரது மற்றொரு மகன் துளசிதாஸ், தனது தந்தையை மீட்டுத்தரக் கோரி சென்னை உயர் நீதிமன்றத்தில் ஆட்கொணர்வு மனுத்தாக்கல் செய்தார்.
அந்த வழக்கு கடந்த வாரம், நீதிபதிகள் என்.கிருபாகரன், வி.எம்.வேலுமணி ஆகியோர் அடங்கிய அமர்வில் விசாரணைக்கு வந்தது. அப்போது, மருத்துவமனையிலிருந்து ஆதிகேசவன் வெளியேறிய காட்சிகள் கண்காணிப்பு கேமராவில் பதிவாகி இருப்பதாக அரசுத்தரப்பில் தெரிவிக்கப்பட்டது.
இதைக்கேட்ட நீதிபதிகள், கரோனா பாதிக்கப்பட்ட நோயாளிகளை தனி கவனம் செலுத்தி பாதுகாக்க வேண்டியதும், உரிய சிகிச்சை அளிக்க வேண்டியதும் அரசு அலுவலர்களின் முக்கிய கடமை என தெரிவித்து, ஆதிகேசவனை ஒரு வாரத்தில் கண்டுபிடித்து ஆஜர்படுத்த உத்தரவிட்டனர்.
ராஜீவ்காந்தி மருத்துவமனையிலிருந்து தப்பி சென்றுள்ளதால், வழக்கில் பூக்கடை காவல் நிலைய ஆய்வாளரை வழக்கில் சேர்த்தும், கீழ்ப்பாக்கம் காவல் நிலைய வழக்கை பூக்கடை காவல் நிலையத்திற்கு மாற்றியும் உத்தரவிட்டனர்.
இந்நிலையில், இந்த வழக்கு நீதிபதிகள் கிருபாகரன், வேலுமணி ஆகியோர் அடங்கிய அமர்வில் இன்று(ஜூலை 14) மீண்டும் விசாரணைக்கு வந்தபோது, மனுதாரர் தரப்பில் வழக்குரைஞர் பூங்குழலி ஆஜராகி, வழக்கு விசாரணையில் எவ்வித முன்னேற்றமும் இல்லை என்றும், ஆவணங்கள் தங்களது காவல் நிலையத்திற்கு வரவில்லை என, பூக்கடை காவல் நிலையத்தில் கூறுவதாகவும் தெரிவித்தார்.
காவல்துறை தரப்பில் ஆஜரான வழக்குரைஞர் பிரபாவதி, மாயமான ஆதிகேசவன் இதுவரை கண்டுபிடிக்கப்படவில்லை என்றும், ஆவணங்களை கீழ்ப்பாக்கம் காவல் நிலையத்திலிருந்து பூக்கடை காவல் நிலையத்திற்கு மாற்ற சற்று தாமதமாகிவிட்டதால், ஒரு வார கால அவகாசம் வேண்டுமென கோரிக்கை வைக்கப்பட்டது.
இதை ஏற்க மறுத்த நீதிபதிகள், வழக்கை நாளைக்கு(ஜூலை 15) தள்ளிவைத்ததோடு, வழக்குப்பதிவு செய்த ஆவணங்கள் வந்துவிட்டதா? விசாரணை தொடங்கிவிட்டதா? என விளக்கமளிக்கும்படி, பூக்கடை காவல் நிலைய ஆய்வாளருக்கு உத்தரவிட்டு விசாரணையை ஒத்திவைத்தனர்.
