ஞானவாபி மசூதியில் உள்ள இந்து கடவுள் சிலைகளை வழிபட அனுமதிகோரிய மனு: எதிர்த்த வழக்கு தள்ளுபடி!

ஞானவாபி மசூதியில் உள்ள இந்து கடவுள்களின் சிலைகளை வழிபட அனுமதி கோரிய மனுவை, எதிர்த்து தொடப்பட்ட வழக்கினை தள்ளுபடி செய்து வாரணாசி மாவட்ட நீதிமன்றம் உத்தரவிட்டுள்ளது.

வாரணாசி: உத்தரப்பிரதேச மாநிலத்தில் உள்ள ஞானவாபி மசூதியின் வெளிப்புற சுவரில் உள்ள இந்து கடவுள்களின் சிலைகளை தினமும் வழிபட அனுமதிகோரி வாரணாசி நீதிமன்றத்தில் இந்து பெண்கள் சிலர் வழக்குத்தொடர்ந்தனர். இந்த வழக்கில் ஞானவாபி மசூதியில் கள ஆய்வு நடத்தவும், அதை வீடியோவாகப் பதிவு செய்யவும் நீதிமன்றம் உத்தரவிட்டது.

பலத்த பாதுகாப்புடன் நடந்த கள ஆய்வில், மசூதி வளாகத்துக்குள் சிவலிங்கம் கண்டெடுக்கப்பட்டதாக கூறப்படுகிறது. இதற்கு எதிர்ப்புத் தெரிவித்த மசூதி நிர்வாகம், உச்ச நீதிமன்றத்தில் மேல்முறையீடு செய்த நிலையில், வழக்கை வாரணாசி நீதிமன்றத்திற்கு மாற்றி உச்ச நீதிமன்றம் உத்தரவிட்டது.

அதன்படி, இந்த வழக்கை கடந்த மே மாதம் 24ஆம் தேதி முதல் வாரணாசி மாவட்ட நீதிமன்றம் விசாரித்து வருகிறது. ஞானவாபி மசூதியில் உள்ள இந்து கடவுள்களின் சிலைகளை தினமும் வழிபட அனுமதி கோரிய மனுவை எதிர்த்து அஞ்சுமன் இன்டெஜாமியா மஸ்ஜித் கமிட்டி வழக்குத்தொடர்ந்திருந்தது.

இன்று(செப்.12) இந்த வழக்கை விசாரித்த மாவட்ட நீதிமன்றம், அஞ்சுமன் இன்டெஜாமியா மஸ்ஜித் கமிட்டியின் மனுவை தள்ளுபடி செய்து உத்தரவிட்டது. அதேபோல், ஞானவாபி மசூதியில் உள்ள இந்து கடவுள்களின் சிலைகளை தினமும் வழிபட அனுமதி கோரிய மனு தொடர்ந்து விசாரிக்கப்படும் என்றும் உத்தரவிடப்பட்டது.

இந்த வழக்கின் விசாரணை வரும் 22ஆம் தேதிக்கு ஒத்திவைக்கப்பட்டுள்ளது. இந்த பரபரப்பான வழக்கில் முக்கியத் தீர்ப்பு அளிக்கப்பட்டுள்ளதால், நீதிமன்ற வளாகம் முழுவதும் போலீசார் குவிக்கப்பட்டுள்ளனர்.