டெல்லி: மக்களவையில் இன்று(பிப்.13) நடைபெற்ற பட்ஜெட் கூட்டத்தொடர் மீதான விவாதத்தின்போது, தென்சென்னை மக்களவை உறுப்பினர் தமிழச்சி தங்கப்பாண்டியன், ஜம்மு- காஷ்மீர் மறுசீரமைப்பு மசோதாவை எதிர்த்து பேசினார். அப்போது, "மத்திய அரசு 2019ஆம் ஆண்டு கொண்டுவரப்பட்ட ஜம்மு காஷ்மீர் மறுசீரமைப்புச் சட்டத்தால் அம்மக்கள் மிகுந்தப் பாதிப்புக்குள்ளாகிவருகின்றனர்.
அவர்களின் சுதந்திரம் பறிக்கப்பட்டு, உரிமைகள் நசுக்கப்படுகின்றன. ஜம்மு- காஷ்மீரில் சிறப்பு அந்தஸ்தை ரத்து செய்து, இரண்டு யூனியன் பிரதேசமாக மாற்றிய பிறகு குடிமைப்பணிகளுக்குத் தேவையான அலுவலர்களுக்கு யூனியன் பிரதேசத்தில் மிகப்பெரிய பற்றாக்குறை நிலவுகிறது என, ஜம்மு- காஷ்மீர் மறுசீரமைப்பு மசோதா 2021ல் குறிப்பிடப்பட்டுள்ளது.
கோவா உள்ளிட்ட யூனியன் பிரதேசத்தில் இருந்து அலுவலர்கள் அங்கு பணியமர்த்தப்படுவார்கள் எனவும் தெரிவிக்கப்பட்டுள்ளது. தற்சார்பு இந்தியா என பேசும் நீங்கள்?(மத்திய அரசு) ஏன் கூடுதல் முக்கியத்துவத்தை கொடுத்து குடிமைப்பணிகளில் ஜம்மு-காஷ்மீரைச் சேர்ந்தவர்களைப் பணியமர்த்தக்கூடாது. இந்த அணுகுமுறையுடன் பாஜக அரசு நடந்துகொண்டால் சட்டப்பேரவைத் தேர்தல் நடைபெறவுள்ள அஸ்ஸாம், மேற்கு வங்கம், தமிழ்நாடு, கேரளா உள்ளிட்ட 5 மாநிலங்களில் தோல்வியைச் சந்திப்பார்கள்.
ஜம்மு- காஷ்மீர் யூனியன் பிரதேசத்தில் பணியாற்றும் குடிமைப்பணியாளர்கள் மத்திய அரசால் உருவாக்கப்பட்ட சட்டத்தின்படி நடப்பார்கள் என தெரிவிக்கப்பட்டுள்ளது. மத்திய அரசால் உருவாக்கப்பட்ட சட்டத்தின்படி நடப்பார்கள் எனக் குறிப்பிட்டதன்மூலம், பாஜக அரசு கூட்டாட்சித் தத்துவத்தையும், ஜனநாயகத்தையும் சிதைக்கிறது.
பெரும்பான்மை பலத்தைப் பயன்படுத்தி, நீங்கள் இதனை ஜம்மு-காஷ்மீரில் செய்யும்போது, நாளை மேற்குவங்கத்திலும், தமிழ்நாட்டிலும், கேரளாவிலும் ஏன் செய்யமாட்டீர்கள்? மத்திய அரசின் என்ஆர்சி, சிஏஏ, புதிய வேளாண் திருத்தச் சட்டங்கள் போன்ற கொடுமையான சட்டங்களை திணிக்கிறது. இதனை, திமுக தலைவர் மு.க.ஸ்டாலின் தொடர்ந்து எதிர்த்துவருகிறார். தங்களின் உரிமைக்காகப் போராடுவதற்கு மக்களுக்கு உரிமையுள்ளது. அரசின் சட்டங்களால் தங்களுக்கு அநீதி இழைக்கப்பட்டுள்ளது என்பதை உணரும்போது, மக்கள் இதனை எதிர்த்து போராடுகின்றனர்" என்றார்.
இதையும் படிங்க: பிரதமர் மோடி முதலில் கோவிட்-19 தடுப்பூசி செலுத்திக்கொள்ள வேண்டும் - தயாநிதி
