புதுச்சேரியில் சட்டப்பேரவை தேர்தல், வரும் ஏப்ரல் 6ஆம் தேதி நடைபெறவுள்ள நிலையில், தேர்தல் பணிகள் விறுவிறுப்பாக நடைபெற்றுவருகிறது. மொத்தமுள்ள 30 தொகுதிகளில் பாஜக கூட்டணியில் உள்ள என்.ஆர். காங்கிரசுக்கு 16 இடங்களும் அதிமுக - பாஜகவிற்கு 14 இடங்களும் ஒதுக்கப்பட்டுள்ளன.
இதுவரை கூட்டணி கட்சிகளின் தொகுதிப் பங்கீடு குறித்து அதிகாரபூர்வ அறிவிப்பு வெளியிடப்படவில்லை. இந்நிலையில் என்.ஆர் காங்கிரஸ் கட்சியின் தலைவர் ரங்கசாமி தட்டாஞ்சாவடி தொகுதியில் போட்டியிடுவதற்காக விவிபி நகரில் உள்ள கூட்டுறவுச் சங்க பதிவாளர் அலுவலகத்தில் இன்று (மார்ச். 15) வேட்புமனு தாக்கல் செய்தார்.
பின்னர் செய்தியாளர்களிடம் பேசிய அவர், "என்.ஆர் காங்கிரஸ் சார்பில் நான் தட்டாஞ்சாவடி தொகுதியில் போட்டியிடுகிறேன். இந்திராநகர் வேட்பாளராக ஏ.கே.டி ஆறுமுகம் போட்டியிடுகிறார். கூட்டணி கட்சியில் எந்தவித குழப்பமும் இல்லை. வேட்பாளர் பட்டியல், தேர்தல் அறிக்கை விரைவில் வெளியிடப்படும். வரும் 17ஆம் தேதி ஏனாம் தொகுதியிலும் வேட்பு மனு தாக்கல் செய்கிறேன்" என்றார்.
இதையும் படிங்க: முன்னாள் முதலமைச்சரின் தொகுதி திமுகவிற்கு ஒதுக்கீடு!
