சண்டிகர்: கோடை கால தொடக்கமாக நாட்டின் பல்வேறு மாநிலங்களில் வெயில் சுட்டெரித்து வருகிறது. பொதுமக்களின் நலனை கருத்தில் கொண்டும், மின் சேமிப்பு முயற்சியாகவும் பஞ்சாப் மாநில அரசு ஆலோசனை மேற்கொண்டது. அதன்படி, மே 2ம் தேதி முதல் ஜூலை 15ம் தேதி வரை, அரசு அலுவலகங்கள் காலை 7.30 மணி முதல் பிற்பகல் 2 மணி வரை செயல்படும் என அறிவிக்கப்பட்டுள்ளது. தற்போது அரசு அலுவலகங்கள் காலை 9 மணி முதல் காலை 5 மணி வரை செயல்பட்டு வருகிறது.
இதுதொடர்பாக முதலமைச்சர் அலுவலகம் தரப்பில், "அரசு அலுவலகங்களின் பணி நேரம் மாற்றம் தொடர்பாக பல்வேறு அதிகாரிகளுடன் ஆலோசிக்கப்பட்டது. இதன் மூலம் பொதுமக்களும் அரசு அலுவலகங்களுக்கு எளிதாக வந்து செல்ல முடியும். அரசு அலுவலகங்கள் காலையிலேயே செயல்பட தொடங்கும் என்பதால், சாமானியர்கள் விடுமுறை எடுக்க தேவையில்லை. அதேபோல் பிற்பகல் 2 மணிக்கு அலுவலகம் முடிந்துவிடும் என்பதால், ஊழியர்கள் தங்கள் குடும்பத்தினருடன் கூடுதலாக நேரம் செலவிடலாம்.
மாநிலத்தின் அனைத்து அரசுத்துறைகளிலும் இந்த நடைமுறையை அமல்படுத்த முதலமைச்சர் உத்தரவிட்டுள்ளார். முன்கூட்டியே அலுவலகங்கள் செயல்படத் தொடங்கும் போது, நாளொன்றுக்கு 300-350 மெகா வாட் மின்சாரத்தை சேமிக்க முடியும். பஞ்சாப்பை பொறுத்தவரை பிற்பகல் 1 மணியளவில் தான் அதிகளவு மின்சாரம் நுகரப்படுவதாக மின்சார வாரியம் தெரிவித்துள்ளது.
பருவநிலைக்கு ஏற்ப பல்வேறு நாடுகளில் அரசு அலுவலகங்கள் செயல்படும் நேரம் மாற்றி அமைக்கப்பட்டு வருகிறது. பொதுமக்களின் நலனுக்கான திட்டங்களை செயல்படுத்துவதில், மாநில அரசு கவனம் செலுத்தும்" என கூறப்பட்டுள்ளது.
இதையும் படிங்க: ஸ்ரீநகரில் ஜி20 கூட்டம் நடத்த மத்திய அரசு உறுதி - சீனா, பாகிஸ்தான் எதிர்ப்பா?
