அமித் ஷா மீது தேர்தல் ஆணையத்தில் புகார் - நாராயணசாமி

மத்திய உள் துறை அமைச்சர் அமித் ஷா மீது தேர்தல் ஆணையத்தில் புகார் அளித்துள்ளதாகப் புதுச்சேரி முன்னாள் முதலமைச்சர் நாராயணசாமி தெரிவித்துள்ளார்.

புதுச்சேரி: காங்கிரஸ் தலைமை அலுவலகத்தில் செய்தியாளர்களைச் சந்தித்த முன்னாள் முதலமைச்சர் நாராயணசாமி, பிரதமர் நரேந்திர மோடியும், அமித் ஷாவும் என் மீதும், காங்கிரஸ் மீதும் ஆதாரமற்ற குற்றச்சாட்டுகளைக் கூறுவதையே வேலையாக வைத்துள்ளதாகத் தெரிவித்தார்.

"பிரதமர் புதுச்சேரி வந்தபோது வழக்கம்போல, என்னையும் காங்கிரஸ் கட்சியையும் குறைச் சொல்வதுதான் அவரது உரையிலே இருந்தது. எங்களுடைய ஆட்சியில் நான் ஊழல் செய்துள்ளதாக என்னைத் தனிப்பட்ட முறையில் விமர்சித்திருக்கிறார்.

பிரதமருக்கு நான் சவால் விடுத்திருக்கிறேன். மத்தியில் உங்களுடைய ஆட்சி இருக்கிறது. நான் ஊழல் செய்திருந்தால் அந்த ஊழலை நிரூபிக்க நீங்கள் தயாரா? ஐந்தாண்டு காலம் காங்கிரஸ் திமுக கூட்டணியில் நான் முதலமைச்சராக இருந்துள்ளேன்.

இந்தக் கூட்டணி ஆட்சியில் நான், என் துறையைச் சேர்ந்தவர்கள் ஊழல் செய்திருந்தால், ஓய்வுபெற்ற அல்லது இப்போது பதவியில் இருக்கின்ற உயர் நீதிமன்ற நீதிபதிகள் அடங்கிய விசாரணைக்கு நான் தயாராக இருக்கிறேன்.

பிரதமர் அதை அறிவிப்பாரா? அவர் சொன்ன ஊழல் புகாருக்கு என்ன ஆதாரம் இருக்கிறது என்பதை அவர் தெளிவுப்படுத்த வேண்டும்.

புதுச்சேரி காங்கிரஸ் தலைவர்கள் செய்தியாளர் சந்திப்பு

காரைக்கால் வந்திருந்த அமித் ஷா என்னை வசைபாடியதைத் தவிர வேறு ஒன்றும் சொல்லவில்லை. மோடி 15 ஆயிரம் கோடி ரூபாய் கொடுத்ததாகவும், அதை நான் கையாடல் செய்துவிட்டதாகவும், அதில் ஒரு பகுதியை நான் எடுத்துக்கொண்டு மீதியைக் காந்தி குடும்பத்திற்குக் கொடுத்தாகவும் என் மீது ஆதாரமற்ற ஊழல் குற்றச்சாட்டுகளை வைத்தார்.

அவர் மீது தேர்தல் ஆணையத்தில் எங்களுடைய காங்கிரஸ் கட்சித் தலைவர்கள் சார்பில் ஒன்றிணைந்து நடவடிக்கை எடுக்கக்கோரி மனு கொடுத்துள்ளோம். ஆனால் இது சம்பந்தமாகத் தேர்தல் ஆணையம் எந்தவித பதிலையும் எங்களுக்குக் கொடுக்கவில்லை. இந்த விவகாரம் தொடர்பாக மேல்கட்ட நடவடிக்கையை நாங்கள் எடுக்கவுள்ளோம்" என்றார்.

எதிர்க்கட்சிகளை வசைபாடுவது, ஆதாரமற்ற குற்றச்சாட்டுக்களைக் கூறுவது, மக்களைத் திசைதிருப்புவது ஆகியவைதான் பாஜகவின் வேலையாக இருப்பதாகக் கூறினார்.

மேலும், "மத்தியில் ஆளும் கட்சியின் அதிகாரத்தால், புதுச்சேரியில் அரசியல் கட்சியினர் சுதந்திரமாகத் தேர்தல் பரப்புரை செய்ய முடியவில்லை. தேர்தல் ஆணையம் பாரபட்சமாக நடந்துகொண்டிருக்கிறது. காவல் துறையினர் இதைக் கண்டுகொள்வதில்லை.

நிர்வாகமும் பாஜகவிற்கு முழுமையாக ஆதரவு கொடுக்கின்றனர். ஒருதலைபட்சமாக நடந்துகொள்கின்றனர். புதுச்சேரி மாநிலத்தில் சுதந்திரமான முறையில் தேர்தல் நடைபெறுமா என்ற சந்தேகம் எழுந்துள்ளது" என்றும் நாராயணசாமி கூறியுள்ளார்.

புதுச்சேரி சட்டப்பேரவைத் தேர்தலில் பாஜகவுக்கு ஆதரவாக நேரடியாகத் துணைநிலை ஆளுநர் தமிழிசை சவுந்தரராஜன் செயல்படுவதாக நாராயணசாமி குற்றஞ்சாட்டினார்.

இதையும் படிங்க: பாஜகவினர் விஷம் போன்றவர்கள் : மல்லிகார்ஜுன கார்கே சீற்றம்