ஒடிசா: ஒடிசா மாநிலத்தின் பாலசோர் மாவட்டத்தில் நிகழ்ந்த ரயில் விபத்தில் உயிரிழப்பு எண்ணிக்கை தொடர்ந்து அதிகரித்து வருகிறது. இந்த நிலையில், அங்கு நிலவும் நிலமை குறித்து அம்மாநில முதலமைச்சர் நவீன் பட்நாயக், ரயில்வே துறை அமைச்சர் அஷ்வினி வைஷ்ணவ், மேற்கு வங்க மாநில முதலமைச்சர் மம்தா பானர்ஜி உள்ளிட்ட பலர் நேரில் சென்று பார்வையிட்டனர்.
தற்போது வரை 261 பேர் உயிரிழந்துள்ள நிலையில், பலர் இடர்பாடுகளின் இடுக்குகளில் சிக்கி உள்ளதாகவும், அவர்களை மீட்கும் பணி தொடர்ந்து நடைபெற்று வருவதாகவும் தென்கிழக்கு ரயில்வே தரப்பில் தெரிவிக்கப்பட்டுள்ளது. இந்த நிலையில், இந்த விபத்து குறித்தும், அதில் இருந்து மீண்டு வர உடனடியாக தேவைப்படும் விவகாரங்கள் குறித்தும் பிரதமர் மோடி அதிகாரிகள் அடங்கிய உயர்மட்ட குழுவுடன் ஆலோசனை மேற்கொள்கிறார்.
அதனைத் தொடர்ந்து ஒடிசாவின் விபத்து நடந்த இடத்திற்கு இன்று பிரதமர் மோடி வருகை தர உள்ளதாக முதற்கட்ட தகவல்கள் வெளியாகி இருந்தன. இந்த நிலையில், “பிரதமர் நரேந்திர மோடி ஒடிசாவில் ரயில் விபத்து ஏற்பட்டதை அடுத்து, அங்கு நிலவும் நிலைமையை ஆய்வு செய்ய புறப்படுகிறார்” என பிரதமரின் அதிகாரப்பூர்வ ட்விட்டர் பக்கத்தில் தெரிவிக்கப்பட்டுள்ளது.
முன்னதாக விபத்து குறித்து தனது ட்விட்டர் பக்கத்தில் செய்தி வெளியிட்டிருந்த பிரதமர் மோடி, ஒடிசா ரயில் விபத்து மிகுந்த வேதனை அளிப்பதாகவும், இந்த துக்ககரமான நேரத்தில் உயிரிழந்தவர்களின் குடும்பங்களை நினைத்து வருந்துவதாகவும் குறிப்பிட்டிருந்தார்.
மேலும், காயமடைந்தவர்கள் விரைவில் குணமடைய வாழ்த்து தெரிவித்த பிரதமர் மோடி, விபத்து நடந்த இடத்தில் நடைபெற்று வரும் மீட்புப் பணிகள் உள்ளிட்ட அனைத்து விஷயங்கள் குறித்தும் ரயில்வே அமைச்சர் அஷ்வினி வைஷ்ணவிடம் கேட்டறிந்து வருவதாகவும் கூறியிருந்தார். அது மட்டுமின்றி, விபத்து நடந்த இடத்தில் மீட்புப் பணிகள் தீவிரமாக நடைபெற்று வருகிறது எனவும், பாதிக்கப்பட்ட அனைவருக்கும் தேவையான அனைத்து உதவிகளும் வழங்க நடவடிக்கை எடுக்கப்பட்டுள்ளதாகவும் கூறியிருந்தார்.
இதனிடையே, மத்திய அரசு சார்பில் விபத்தில் உயிரிழந்தவர்களுக்கு 10 லட்சம் ரூபாய், படுகாயம் அடைந்தவர்களுக்கு 2 லட்சம் ரூபாய் மற்றும் காயம் அடைந்தவர்களுக்கு 50 ஆயிரம் ரூபாய் நிவாரணம் வழங்கப்படும் என அமைச்சர் அஷ்விணி வைஷ்ணவ் நேற்று அறிவித்தார்.
அதேபோல், பிரதமரின் தேசிய நிவாரண நிதியில் இருந்து விபத்தில் உயிரிழந்தவர்களுக்கு 2 லட்சம் ரூபாய் மற்றும் காயம் அடைந்தவர்களுக்கு 50 ஆயிரம் ரூபாய் வழங்கப்படும் என பிரதமர் நரேந்திர மோடி அறிவித்திருந்தார். இந்த நிலையில்தான் பிரதமர் மோடி இன்று ஒடிசா வர உள்ளார்.
இதையும் படிங்க: Odisha train accident: ஒடிசாவின் மீண்டும் ஒரு 'கருப்பு வெள்ளி'.. வரலாற்றில் 2வது முறையாக நிகழ்ந்த கோர விபத்து
