மாலே : அதிபர் முகமது முய்சு பதிவியேற்பை தொடர்ந்து இந்தியா - மாலத்தீவு இடையிலான நட்புறவில் தொடர் விரிசல் ஏற்பட்டு உள்ளது. பொதுவாகவே இந்திய எதிர்ப்பு அரசியல் கொள்கைகளை கொண்டவரான முகமது முய்சு, தீவு நாடான மாலத்தீவில் உள்ள இந்திய ராணுவத்தை வெளியேற்றுவது, இந்தியாவுக்கு முதலிடம் என்கிற கொள்கையை மாற்றுவது உள்ளிட்ட தேர்தல் வாக்குறுதிகளை வழங்கியே அதிபராக வெற்றி பெற்றார்.
தொடர்ந்து சீனாவுடன் கூட்டணி அமைத்து இந்திய எதிர்ப்பு அரசியலில் தீவிரம் காட்டி வருகிறார். அதிபராக முகமது முய்சு பதவியேற்றதை அடுத்து மாலத்தீவில் உள்ள இந்திய ராணுவத்தின் துருப்புகளை வெளியேற உத்தரவிட்டடார். இது தொடர்பான மாலத்தீவு அரசு இரண்டு மாதங்களாக கூறி வரும் நிலையில், மார்ச் 15ஆம் தேதிக்குள் மாலத்தீவை வெளியிட்டு இந்திய ராணுவ துருப்புகள் வெளியேற அதிபர் முகமது முய்சு கெடு விதித்து உள்ளதாக தெரிவிக்கப்பட்டு உள்ளது.
இது தொடர்பாக மாலத்தீவு அதிபர் மாளிகை பொது கொள்கை செய்லாளர் அப்துல்லா நசிம் இப்ராஹிம் செய்தியாளர்கள் சந்திப்பில், மாலத்தீவு அதிபர் முகமது முய்சு, மார்ச் 15ஆம் தேதிக்குள் இந்தியா அதன் துருப்புகளை வெளியேற்ற வேண்டும் என கெடு விதித்து உள்ளதாக கூறினார். இந்திய ராணுவ அதிகாரிகள் இனி மாலத்தீவில் தங்க முடியாது என்றும், இது அதிபர் முகமது முய்சு எடுத்த நிர்வாக கொள்கை என்றும் அவர் கூறினார்.
முன்னதாக இதுகுறித்து கலந்து ஆலோசிக்க இந்தியா - மாலத்தீவு இடையிலான உயர் மட்ட ஆலோசனைக் கூட்டம் நடைபெற்றது. இதில் இந்திய தூதர் முனு மஹவார் உள்ளிட்டோர் கலந்து கொண்டு பேச்சுவார்த்தை நடத்தியதாகவும், அப்போது மாலத்தீவை விட்டு இந்திய படைகள் வெளியேறுமாறு அதிபர் முகமது முய்சு வேண்டுகோள் விடுத்ததாக தெரிவிக்கப்பட்டு உள்ளது. இருப்பினும் இந்த பேச்சுவார்த்தை குறித்து இந்திய அதிகாரிகள் கருத்து தெரிவிக்கவில்லை.
சீன ஆதரவு நிலைப்பாடு கொண்ட அதிபர் முகமது முய்சு, அண்மையில் சீன அதிபர் ஜி ஜின்பிங்கின் அழைப்பை ஏற்று அங்கு சுற்றுப்பயணம் மேற்கொண்டார். தொடர்ந்து அந்நாட்டு அரசுடன் 21 ஒப்பந்தைகளை கையெழுத்திட்டார். மேலும் மாலத்தீவுக்கு அதிகளவிலான சீனர்களை சுற்றுலாவுக்கு அனுப்பி வைக்க வேண்டும் என அதிபர் முய்சு வலியுறுத்திக் கேட்டுக் கொண்டார்.
தனது சுற்றுப்பயணத்தை முடித்துக் கொண்டு நாடு திரும்பிய அதிபர் முகமது முய்சு, தாங்கள் சிறிய நாடாக இருக்கலாம் என்றும் அதற்காக தங்களை ஆளும் உரிமையை வழங்கிவிட முடியாது என்று மறைமுகமாக இந்தியாவை சாடினார். இந்நிலையில், மாலத்தீவு தலைநகர் மாலேவில் மேயர் தேர்தலுக்கான வாக்கு எண்ணிக்கை நடைபெற்றது.
மாலே மேயர் தேர்தலில் அதிபர் முகமது முய்சுவின் கட்சி படுதோல்வியை சந்தித்தது. இந்திய ஆதரவு அரசியல் நிலைப்பாடு கொண்டு இருந்த மாலத்தீவு ஜனநாயக கட்சி வேட்பாளர் ஆடம் அசிம், ஏறத்தாழ 5 ஆயிரத்து 303 வாக்குகள் பெற்று அபார வெற்றி பெற்றதாக அறிவிக்கப்பட்டார்.
இதையும் படிங்க : இந்திய எதிர்ப்பு அரசியல் - மாலத்தீவு அதிபருக்கு பேரிடி! சொந்த தொகுதி தேர்தலில் தோல்வி!
