கடந்த சில நாள்களாக குறைந்திருந்த கரோனா பாதிப்பு, தற்போது மீண்டும் அதிகரிக்கத் தொடங்கியுள்ளது. குறிப்பாக, மகாராஷ்டிரா, கேரள மாநிலங்களில்தான் அதிகப்படியான கரோனா பாதிப்புகள் கண்டறியப்பட்டுள்ளது. இதையடுத்து, மாநில அரசுகள் கரோனா விதிமுறைகளைக் கட்டாயமாகப் பின்பற்றுமாறு மக்களுக்கு அறிவுறுத்தி வருகின்றனர். முகக்கவசம் இல்லாமல் வெளியில் சுற்றுபவர்களிடம், அபராத தொகை வசூலிக்கப்பட்டு வருகிறது. மும்பை மேயர் கிஷோரி பெட்னேகர், மக்களை நேரடியாகச் சந்தித்து கரோனா விதிமுறைகளைப் பின்பற்றுமாறு அறிவுறுத்தினார்.
இந்நிலையில், மாணவர்கள் கரோனா விதிமுறைகளைப் பின்பற்றி கரோனா போரில் வெற்றி பெற உதவி செய்ய வேண்டும் என மகாராஷ்டிரா சுகாதாரத் துறை அமைச்சர் ராஜேஷ் டோப் தெரிவித்துள்ளார்.
இதுகுறித்து அவர் கூறுகையில், " பள்ளி, கல்லூரிகள் தற்போது திறக்கப்பட்டுள்ளன. ஆனால், கரோனா பாதிப்பு குறைந்தபாடில்லை. கடந்த ஒரு வருடமாக கரோனாவுடன் போராடி வருகிறோம். நிச்சயமாக, இந்தப் போரில் வெற்றிப் பெறுவோம். ஓடியாடி விளையாடிக் கொண்டிருந்த பிள்ளைகள், கடந்த ஒரு வருடமாக வீட்டிலேயே இருக்க வேண்டிய நிலைமை இருந்தது. தற்போது, கரோனா போரில் வெற்றிபெற நீங்கள் தான் உதவி செய்ய வேண்டும்" எனத் தெரிவித்துள்ளார்.
மும்பையில் இதுவரை கரோனா விதிமுறைகள் மீறிய குற்றத்திற்காக, 33 கோடி ரூபாய் அபராத தொகையாக வசூலிக்கப்பட்டுள்ளது. ஒரே நாளில், 23 ஆயிரத்துக்கும் அதிகமானோர் மாஸ்க் அணியாமல் அபராதம் செலுத்தியுள்ளனர். கோயில்களில் தரிசன நேரம் போன்றவற்றில் பல்வேறு கட்டுப்பாடுகள் விதிக்கப்பட்டுள்ளது.
அதுமட்டுமின்றி, தனியார் மருத்துவமனைகளில் கரோனா நோயாளிகளுக்காக பிரத்யேக படுக்கைகள் ஒதுக்கி வைக்குமாறு மும்மை மாநகராட்சி ஆணையர் அறிவுறுத்தியுள்ளார். வாசிம் மாவட்டத்தில் உள்ள ஒரு பள்ளியில் 229 மாணவர்களும், 4 ஆசிரியர்களும் கரோனாவால் பாதிப்படைந்ததையடுத்து, அப்பள்ளியை 10 நாள்களுக்கு தற்காலிகமாக மாவட்ட நிர்வாகம் மூட உத்தரவிட்டுள்ளது குறிப்பிடத்தக்கது.
இதையும் படிங்க: ஓடிடி தளங்களுக்கு கட்டுப்பாடு விதிப்பு!
